Nursultan Nazarbaev ómirdiń mánin qalaı túsinetindigin aıtyp berdi

«Men az ómir súrgen joqpyn, ıaǵnı ómirlik tájirıbeme qarap, ómirdiń máni týraly oılaı berý qur beker is. Ómirdiń mánin Jaratýshymyz týǵanymyzda bizdiń genimizge salyp bergen», - dedi Nursultan Nazarbaev Astananyń «jasyl beldeýin» quraıtyn orman alqabyn aralap shyqqannan keıin BAQ ókilderine bergen suhbatynda.

Memleket basshysy ómirdiń máni jaıynda kóp oılana berý kerek emes ekenin, atap aıtqanda, qarapaıym adam úshin ómirdiń máni jaqsy ómir súrýde jáne Otan ıgiligi úshin adal eńbek etýde jatqandyǵyn jetkizdi.

«Biz árqashan ótkenmen ómir súrýdemiz, ıaǵnı «neni durys istemedik?» degendi oılaýmen bolamyz. Nemese, bolashaqty oılap, «on jyldan keıin ne bolady?» dep oıǵa túsip jatamyz. Al ony kim biledi?» - dedi N.Nazarbaev.

Prezıdent Jer shary óte názik ekenin jáne kóptegen qaterlerge tap bolýy múmkin ekendigin atap ótti.

«Bizdiń planeta galaktıkanyń bir bóligi ǵana. Adamnyń basyna keletin neshe túrli bále bar. Onyń barlyǵyn oılasań, ómir súre almaısyń. Alla bizge jan bergen kezde qashan baqılyq bolatynymyzdy eshkimge aıtqan joq. Ony biletin bolsaq, ómirdiń ózi sumdyq bolar edi. Barlyq dinderde Jaratýshy ıemizge qulshylyq etý jaıynda aıtylǵan. Ókinishke qaraı, barlyǵy qulshylyqty oryndap jatqan joq. Ómirdiń máni - jaqsy ómir súrip, jaqyndaryń men dostaryńdy jaqsy kórip, Otanyńdy súıý jáne balalardyń bolashaǵyna jaǵdaı jasaý!» ,- dep túıindedi N.Nazarbaev.