«Nursultan Nazarbaev. Ómirbaıan» kitaby arab tilinde jaryq kórdi

ASTANA. QazAqparat  - Saýd Arabııasynda Elbasynyń ómir joly týraly kitaptyń arab tilindegi nusqasy tanystyryldy. Avtory - belgili pýblıtsıst, Prezıdent Keńsesiniń basshysy - Mahmud Qasymbekov, dep jazady Habar 24.

 «Nursultan Nazarbaev Ómirbaıan» atty týyndynyń arab tilinde jaryq kórýine Er-Rııadtaǵy ıslam zertteý ortalyǵy uıytqy bolǵan. Tusaýkeser aıasynda ótken konferentsııada sheteldik jýrnalıster men sarapshylar Qazaqstannyń ótkeni men búgini jaıly maǵlumatqa qanyqty. Al arnaıy uıymdastyrylǵan kórmede elimizdiń ásem kórinisteri pash etildi. Sondaı-aq, Tuńǵysh Prezıdent kitaphanasy men Korol Feısal atyndaǵy ıslam zertteý ınstıtýty arasynda yntymaqtastyq týraly memorandým jasaldy. Sol arqyly taraptar ǵylymı zertteý jumystaryn birlesip júrgizýge ýaǵdalasty. «Arab álemi dúnıedegi eń úlken órkenıetterdiń bireýi ǵoı. Sondyqtan kitaptyń arab tilinde shyǵýy bizder úshin úlken qýanysh. Hanzadamen kelisimge keldik. Qazaq tarıhy týraly arab tilinde kitap shyǵarý týraly kelisimge keldik. Eger ol shyqsa, biz úshin úlken nátıje bolar edi»,- deıdi QR Prezıdenti Keńsesiniń basshysy, kitap avtory Mahmud Qasymbekov.