Nursultan Nazarbaev «Nur Otan» partııasy bastaýysh uıymdaryn quttyqtady
Sondaı-aq, bastaýysh uıymdardyń tóraǵalary, belsendi partııa músheleri, memlekettik organ ókilderi men Parlament depýtattary sóz alyp, osyndaı aýqymdy basqosýdyń mańyzyna toqtalyp ótti. Odan bólek, Forýmda bastaýysh partııa uıymdarynyń qyzmetin jandandyrý tujyrymdamasy maquldanyp, aldaǵy basym baǵyttar anyqtaldy jáne «Úzdik bastaýysh partııa uıymdary» respýblıkalyq baıqaýynyń jeńimpazdary marapattaldy.
Elbasy óziniń quttyqtaý sózinde «Nur Otan» partııasynyń 20 jyldyq mereıli belesine oraı ótkizilip otyrǵan Bastaýysh partııa uıymdary birinshi forýmynyń ashylýymen quttyqtap, bul aıtýly oqıǵa partııanyń eń basty resýrsy onyń músheleri, ıaǵnı Otanymyzdyń damýyna, órkendep, gúldene túsýine eleýli úles qosyp kele jatqan qoǵamnyń eń belsendi ári jaýapty ókilderi ekenin kórsetetinin atap ótken.
«Búginde bizdiń aldymyzda Qazaqstandy álemdegi básekege qabiletti 30 memlekettiń qataryna qataryna engizetin jańa damý modelin qalyptastyrý mindeti tur. Men bıylǵy Joldaýymda elimizdiń damý deńgeıi árbir azamatymyzdyń ál-aýqatymen ólshenetinin atap óttim. «Nur Otan» partııasy jetekshi saıası kúsh retinde damýdyń lokomotıvi bolyp qana qoımaı, sonymen birge ár qazaqstandyqtyń memlekettiń áleýmettik saıasatynyń ıgiligin sezinýiniń kepili de bolýy tıis. Bul maqsattarǵa qol jetkizý úshin partııamyzdyń ózi de jetilip, zamanaýı úrdister men talaptarǵa saı jumys isteýge beıimdelgeni jón», - delingen Memleket basshysynyń quttyqtaý hatynda.
Sondaı-aq partııa Tóraǵasy Saıası keńestiń bıylǵy maýsym aıyndaǵy keńeıtilgen otyrysynda partııanyń júıeli jańǵyrý úderisi bastalǵanyna jáne onyń basty baǵyttarynyń biri - bastaýysh partııa uıymdarynyń jumysyn jandandyrý ekenine nazar aýdarǵan.
«Búgingi basqosý partııa qyzmetine tyń serpin berip, jumys tásilderin jetildirý jolyndaǵy mańyzdy qadam bolady dep senemin. Tájirıbesi mol jergilikti saıası kóshbasshylar jetekshilik etip otyrǵan bastaýysh partııa uıymdary - kadrlyq rezervti qalyptastyrýdyń negizgi kózi. Olar sondaı-aq azamattarmen jáne qoǵamdyq uıymdarmen yqpaldastyq ornatýdyń da mańyzdy býyny bolýǵa tıis. Partııamyzdyń aldynda turǵan jańǵyrý úderisin tabysty júzege asyrý - sizderdiń kúsh-jigerlerińizge tikeleı baılanysty. Barshańyzǵa el ıgiligi men halqymyzdyń ál-aýqatyn arttyrý jolynda jańa jetistikter tileımin», - delingen Elbasynyń quttyqtaýynda.
Odan bólek, jıynda atalǵan Forýmnyń partııanyń 20 jyldyǵyna arnalǵan sharalardyń basy ekeni de aıtyldy.
- Ózderińizge belgili, kelesi jyly partııamyzdyń mereıtoıyn atap ótemiz. Osy jyldar ishinde bizdiń partııamyz elimizdegi jetekshi saıası uıym retinde qalyptasý jolynan súrinbeı ótti. Partııa negizi qalanǵan kúnnen bastap ekonomıkalyq, áleýmettik jáne saıası saladaǵy Elbasy saıasatynyń basty ári negizgi oryndaýshysy bolyp keledi. Sodan beri biz barsha qazaqstandyqtardy Prezıdent reformalaryn qoldaýǵa jumyldyryp, aýqymdy jumystardy atqardyq dep aıtýǵa tolyq negiz bar. Bul iste bastaýysh uıymdarymyzdyń mańyzy zor. Partııamyzdyń negizin dál osy sizder, ıaǵnı bastaýysh uıymdar qurap otyr. Bizdiń jeńisterimiz ben jetistikterimizdiń barlyǵy sizderdiń eren eńbekterińizdiń jemisi, - dedi Máýlen Áshimbaev.
Búginde «Nur Otannyń» 17 - aımaqtyq jáne 230 aýmaqtyq fılıaly men 6 myńǵa jýyq bastaýysh partııa uıymy bar.
Sonymen qatar «Nur Otan» partııasy Tóraǵasynyń Birinshi orynbasary jahandyq syn-qaterlerge laıyqty tótep berý maqsatynda Elbasy naqty maqsat-mindetterdi aıqyndap bergenin, olardy nátıjeli júzege asyrý úshin aldymen partııanyń ózi HHІ ǵasyrdyń barlyq talaptaryna saı, tıimdi, joǵary tehnologııaly, ınnovatsııaǵa beıim, básekege qabiletti saıası uıym bolýy tıis ekenin jetkizdi.
Sondaı-aq ol osy maqsatta qolǵa alynǵan partııa qyzmetin jańǵyrtý bastamasynyń alǵashqy nátıjelerine de nazar aýdardy. Ótken maýsym aıynda bastaý alǵan partııalyq jańǵyrý aıasynda búginde elimizde jastarymyzdyń baǵdarlamalaý, robot tehnıkasy, 3D-modeldeý negizderin jetik meńgerip, osy salada tereń bilim alýyna múmkindik beretin 761 ІT-synyp ashylyp, onda 22 myńnan astam mektep oqýshysy bilim alýda. Onyń teń jartysynyń aýyl-aımaqtarda ashylýy kóńil qýantady.
Odan bólek, partııanyń bastamasymen elimiz boıynsha 24 ІT-ortalyq ashylyp, onda 1600-den astam azamat jańa tehnologııalar boıynsha bilim aldy. Basqa partııalyq jobalar boıynsha da aıtarlyqtaı naqty nátıjelerge qol jetkizilgen. Máselen, el kóleminde mektep janyndaǵy 47 sport alańy jańartylyp, qaıta jabdyqtaldy. Kitaphanalar bazasynda 120-ǵa jýyq zamanaýı bilim ortalyǵy ashyldy. Sonyń ishinde aýyldyq jerlerdegi kitaphanalardy da erekshe atap ótken jón. Jasotandyq eriktiler aýyl balalaryna aǵylshyn tilin úıretý úshin belsendi jumys isteýde. Mektep ashanalaryn jańǵyrtý jobasy boıynsha da tıisti jumystar júrgizilip jatyr.
- Bul jobalardyń bári - Elbasymyzdyń ıntellektýaldy, deni saý jáne básekege qabiletti ult qalyptastyrý jolyndaǵy ıgi bastamalarynyń laıyqty jalǵasy jáne ajyramas bir bóligi, - dedi Máýlen Áshimbaev.
Budan basqa, partııa Tóraǵasynyń Birinshi orynbasary partııanyń Ortalyq apparaty men barlyq fılıaldarynyń jáne bastaýysh partııa uıymdarynyń aldynda turǵan basym baǵyttarǵa toqtalyp ótti.
- Birinshiden, Elbasy Joldaýynyń strategııalyq mańyzyn eskere otyryp, «Nur Otan» partııasy onyń tıimdi júzege asyrylýyn qamtamasyz etetin negizgi kúshke aınalýy tıis. Osy baǵytta qoǵamdyq baqylaý jumystaryn kúsheıtip, onyń máni men mańyzyn ár qazaqstandyqqa jetkizýde belsendi áreket etýimiz kerek. Ekinshiden, partııanyń kadrlyq áleýetin arttyrý úshin bastaýysh uıymdardyń belsendi músheleri men kóshbasshylarynyń biliktiligin molynan paıdalanýymyz kerek. Partııanyń kadrlyq rezervin qalyptastyrýda osy máseleni mindetti túrde eskergen jón. Úshinshiden, bastaýysh uıymdarymyzdyń halyqpen jumys tıimdiligin odan ári arttyrý qajet. Ol úshin jetekshilerdiń ózderi saıası tájirıbege baı, ıdeologııa, menedjment, psıhologııa sııaqty salalarda saýatty bolýy tıis. Tórtinshiden, bastaýysh partııa uıymdarynyń materıaldyq-tehnıkalyq bazasyn kúsheıtý kerek. Besinshiden, partııa jumysynda tsıfrlyq tehnologııalardy keńinen qoldanyp, «Tsıfrly partııa» jobasyn júzege asyrýda belsendi áreket etýge tıispiz. Altynshydan, belsendi azamattar men jastardy jumyldyrý arqyly partııa jumysyn kúsheıtýdiń mańyzy zor, - dedi Máýlen Áshimbaev.
«Nur Otan» partııasy Tóraǵasynyń Birinshi orynbasary osy basymdyqtardy júzege asyrý úshin barlyq partııa fılıaldarynyń bastaýysh uıymdarǵa qoldaý kórsetýin mindettep, aldaǵy ýaqytta bul áreket olardyń jumys tıimdiligin baǵalaýda eskeriletinin jetkizdi.
Erekshe atap óter jaıt, Elbasy, partııa Tóraǵasynyń bastamasymen budan bylaı bastaýysh partııa uıymdarynyń Forýmy dástúrge aınalyp, eki jylda bir ret ótkizilip turatyn boldy. Bul partııa jumysyna qatysty kez kelgen máseleni talqylap, pikir almasýǵa múmkindik beretin jańa alań bolmaq.
Іs-shara barysynda Parlament Senatynyń depýtaty, Qazaqstan Respýblıkasy Prezıdentiniń Bes áleýmettik bastamasynyń júzege asyrylýyn baqylaý jónindegi qoǵamdyq keńestiń tóraǵasy Baqytjan Jumaǵulov, Parlament Májilisiniń depýtaty, «Nur Otan» partııasy fraktsııasy jetekshisiniń orynbasary Nurtaı Sabılıanov, Eńbek jáne halyqty áleýmettik qorǵaý mınıstri Mádına Ábilqasymova sóz alyp, óz taraptarynda atqarylǵan jumystar jaıyn baıandap berdi.
Óz kezeginde «Nur Otan» partııasynyń Hatshysy Tamara Dúısenova bastaýysh partııa uıymdarynyń jumysyn jandandyrý baǵytynda qolǵa alynǵan naqty jumystarǵa jan-jaqty toqtalyp ótti. Belsendi partııa músheleri men ár óńirden kelgen bastaýysh partııa uıymdarynyń basshylary da kóterilgen máselege qatysty ózekti pikirleri men utymdy oılaryn jetkizdi.
Barlyq usynystar jıyn kezinde qatysýshylar tarapynan qoldap tapqan Bastaýysh partııa uıymdarynyń qyzmetin jandandyrý tujyrymdamasynda eskeriletin bolady. Atalǵan tujyrymdamada aǵymdaǵy jaǵdaı men bastaýysh partııa uıymdarynyń damý barysy jan-jaqty taldanǵan. Sondaı-aq saıası partııalardyń bastaýysh uıymdarynyń jumysyn uıymdastyrýdaǵy halyqaralyq tájirıbelerge de nazar aýdarylǵan. Eń bastysy, bul qujatta bastaýysh uıymdardyń jumysyn jetildirý, sapaly partııalyq aktıv pen kásibı kadrlyq rezerv qalyptastyrý, ózekti máselelerdi anyqtaý tehnologııalary men olardy sheshýdiń tıimdi tetikteri, tsıfrly tehnologııalar men aqparattyq-kommýnıkatsııalyq jumysty jandandyrý jáne bastaýysh uıymdardyń basqarý júıesinde jańa jumys formattaryn engizýdiń utymdy joldary aıqyn kórsetilgen.
Jıyn sońynda «Úzdik bastaýysh partııa uıymdary» respýblıkalyq baıqaýynyń jeńimpazdary men júldegerleri marapattaldy.
Aıta keteıik, keshe Forýmnyń birinshi jumys kúninde túrli taqyrypta paneldi sessııalar ótip, partııalyq jumystyń halyqaralyq tájirıbesi, buqaralyq aqparat quraldary men áleýmettik jelilerdegi jumystyń zamanaýı tehnologııalary, partııalyq kadrlyq rezerv qalyptastyrý, bastaýysh uıym jumysyn baǵalaý júıesi jáne taǵy basqa da kóptegen máseleler talqylandy
