Nursultan Nazarbaev Nıý-Iorkte AQSh-tyń iri kompanııalar basshylarymen kezdesti
Kezdesý barysynda Memleket basshysy kompanııanyń Qazaqstanda jumys júrgizý jónindegi sheshimin quptaıtynyn aıtty.
«Sizderdiń Qazaqstanda, «Astana» halyqaralyq qarjy ortalyǵynda jumys isteý jónindegi sheshimderińizdi qoldaımyz. Biz Konstıtýtsııaǵa jáne elimizdiń birqatar zańyna ózgerister engizdik. Onda aǵylshyn quqyǵy engizilgen jáne qatysýshylardyń barlyǵyna jeńildikter qarastyrylǵan. Jumys isteıtinder úshin barlyq qolaıly jaǵdaıdy jasaımyz», - dedi Qazaqstan Prezıdenti.
Nursultan Nazarbaev «Nasdaq» kompanııasynyń bul sheshimi onyń seriktesteri men basqa da sheteldik kompanııalardy «Astana» halyqaralyq qarjy ortalyǵymen yntymaqtastyqty damytýǵa jeteleıtinin atap ótti.
A.Frıdman Qazaqstannyń halyqaralyq qarjy ortalyǵyn qurý jolynda atqarǵan jumystarynan alǵan áseri jóninde aıtty.
«Biz «Astana» halyqaralyq qarjy ortalyǵyn damytý jónindegi josparlarǵa óte tánti boldyq. Qarjy ortalyǵynyń jumysyna qatysty barlyq máseleniń jan-jaqty qarastyrylǵanyn atap ótkimiz keledi. Bul jumystyń tyńǵylyqty atqarylǵanyna rızamyz», - dedi «Nasdaq» kompanııasynyń basshysy.
Sonymen qatar, A.Frıdman «Astana» halyqaralyq qarjy ortalyǵymen yntymaqtastastyqty bastaýǵa jáne Qazaqstan bırjasynyń jumysyna qajetti ozyq tehnologııalarmen qamtamasyz etýge ázir ekenin aıtty.
Kelissóz barysynda taraptar birlese jumys isteýdiń jáne Qazaqstanda qolaıly ınvestıtsııalyq ahýal qalyptastyrý úshin uzaq merzimdi baılanystardy ornatýdyń mańyzdylyǵyn atap ótti.
Sońynda Memleket basshysy Nursultan Nazarbaev A.Frıdmandy bıylǵy shilde aıynda bolatyn «Astana» halyqaralyq qarjy ortalyǵynyń resmı túrde ashylý rásimine qatysýǵa shaqyrdy.
Sondaı-aq, Memleket basshysy «Goldman Sachs» kompanııasynyń prezıdenti Harvı Shvartspen júzdesti.
Kezdesýde taraptar «Astana» halyqaralyq qarjy ortalyǵy men «Goldman Sachs» kompanııasynyń odan ári yntymaqtasý máselelerin talqylady.
Nursultan Nazarbaev halyqaralyq qarjy ortalyǵyn qurý úshin atqarylǵan jumystardyń nátıjelerine toqtaldy.
«Búginde barlyq quqyqtyq jaǵdaı jasaldy. Aǵylshyn quqyǵy bazasyndaǵy sot quryldy. Qatysýshylar úshin qajetti barlyq jeńildikter qarastyryldy, sonyń ishinde vıza jáne salyq jeńildikteri de bar», - dedi Qazaqstan Prezıdenti.
Sonymen birge, Qazaqstan Prezıdenti «ExxonMobil» kompanııasynyń bas atqarýshy dırektory Darren Výdspen kezdesti.
Memleket basshysy Qazaqstan men «ExxonMobil» kompanııasy arasynda munaı-gaz salasynda qalyptasqan ekonomıkalyq seriktestikti aıryqsha atap ótti.
Qazaqstan Prezıdenti bul kompanııanyń Teńiz jáne Qashaǵan munaı-gaz ken oryndaryn ıgerýge arnalǵan jobalarǵa atsalysyp otyrǵanyn aıtty.
D.Výds Nursultan Nazarbaevty Qazaqstannyń BUU Qaýipsizdik Keńesindegi tóraǵalyǵynyń bastalýymen jáne AQSh Prezıdenti D.Tramppen ótken kelissózderdiń tabysty bolýymen quttyqtady.
