Nursultan Nazarbaev mınıstrler men ákimderdi problemalardy jasyrmaýǵa shaqyrdy

NUR-SULTAN. QazAqparat – Ákimder men mınıstrler oryn alǵan problemalarǵa qatysty halyq aldyna shyǵyp, jaýap berýden qoryqpaýy kerek. Bul týraly «Nur Otan» partııasy Saıası keńesiniń keńeıtilgen otyrysynda QR Tuńǵysh Prezıdenti – Elbasy Nursultan Nazarbaev aıtty, dep habarlaıdy QazAqparat tilshisi.

«Menińshe, oryn alyp otyrǵan problema jaıynda úndemeı qalý – jumystyń eń nashar nusqasy. Adamdardan tyǵylmaı mán-jaıdy anyqtap, jaýapkershilikti moıynǵa alý kerek. Bizde halyqqa shyǵyp, bul suraqtarǵa jaýap berýden qoryqpaıtyn, problemalardy sheshetin ákimder de, mınıstrler de bar. Berdibek Máshbekuly (QR Úkimet basshysynyń orynbasary Saparbaev), vıtse-premer bolyp taǵaıyndalýyńmen quttyqtaımyn. Baıaǵydan beri osy jer seniń ornyń edi. Tórt oblysta ákim boldyń. Sonyń bárin kórdiń. Bastaǵan kezde halyqtyń arasynda júrdik sol ýaqytta. Elmen sóılesip júrdik. Aıtqanymyzdy el túsinip júrdi», - dedi QR Tuńǵysh Prezıdenti.

Elbasy shaǵyn problemalardy jedel sheshý qajettigine nazar aýdardy.

«Adamdardy ómirindegi eń kishkentaı máseleler tolǵandyrady. Máselen, sý joq. Bul ákim úshin deńgeı emes qoı, ıá? Sýmen aınalysýdyń qajeti qansha? Al adamdar úshin – bul ómiriniń máni. Aýylda jol joq. Bul ol úshin – ómiri, al bizder úshin – bolmashy nárse. Bizder jahandyq máselelerge qulash sermeımiz. Sondyqtan adamdarǵa jaqyn bolý kerek. Partııanyń qoǵamdyq qabyldaýlary jumys isteýi tıis», - dedi N.Nazarbaev.