Nursultan Nazarbaev: Men óz saıası bolashaǵymdy qaterge tiktim
«Meniń dosym I Hýan Karlos ІІ Fılıpp korol bolǵan shaqta el astanasyn Toledodan Madrıdke kóshirýdiń naǵyz daýǵa aınalǵanyn aıtyp bergen edi. Djordj Vashıngton da elsiz dalada jańa astana salǵanda aıaýsyz synnyń astynda qaldy. Meniń de tarapyma biraz syn aıtyldy. Tipti bir gazet «Prezıdent Nazarbaevtyń jeke astanasy» degen taqyryppen maqala shyǵardy. Onda «eńbekaqy men zeınetaqyǵa jumsalatyn aýqymdy qarajatty jymqyrýdy eshqandaı strategııalyq jospar aqtaı almaıdy» dep jazǵan. Halyq arasynda Aqmolada jaz boıy ańyzaq jel soǵady, qysta qalany qar basady, qalanyń ózi batpaq ústine tur, deni durys aýyz sý da joq degen áńgimeler órip júrdi», - dep eske aldy Prezıdent.
Ol týǵan ólkede jaman jerdiń jáne jaman aýa raıynyń bolmaıtynyn atap ótti.
«Árıne, mundaǵy klımatty keremet dep aıtýǵa kelmeıdi. Dala borany soǵady. Bir kúni boranǵa baılanysty, áýejaı tutas táýlikke jabylǵan. Onda tikushaq ta qondyra almaı, Astanaǵa Kókshetaýdan poıyz arqyly jetkenim bar. Týǵan ólkeńniń jaman jeri bola ma eken? Munyń barlyǵy - bizdiń Otanymyz, Otanymyzdyń klımaty, Otanymyzdyń tabıǵaty. «Týǵan jerdiń tútini de qymbat» degen sóz bar. Saryarqanyń tabıǵaty ózinshe sulý. Bir jaǵynda - Qorǵaljyn, ekinshi jaǵynda - Býrabaı. Úshinshi jaqta - Ereımentaý, ári qaraı - Qarqaraly, Baıanaýyl bar», - dedi Nursultan Nazarbaev.
«Ókinishke qaraı, qalany halyqaralyq tanystyrylymǵa daıyndyq barysyn «Oba kezindegi toıǵa» teńegen jýrnalıster boldy. Gazetter men telearnalar Aqmolanyń masalary týraly «armansyz» jazdy, sıýjet kórsetti. Ondaı materıaldardyń eshqaısysyna mán bermedim. Mán berýge ýaqyt ta bolmady. Fılosoftar aıtqan sóz bar: «Eger aldyńa maqsat qoısań, oǵan jeter jolda ár úrgen ıtke taıaq laqtyrsań, maqsatyńa múldem jetpeısiń». Eshteńege qaramastan, aldymda qoıǵan maqsatqa týra júre berdim», - dedi ol.
Sonymen birge, Prezıdent qalany masadan tazartý, topyraqty keptirý, abattandyrý jumystaryn qalaı júrgizgenin aıtyp berdi.
«Masalardan arylýdyń eń úzdik joly qaladaǵy topyraqty keptirý boldy. Bul máseleni óte jyldam sheshtik. Esildiń boıyndaǵy qamys-qopalary shabyldy, qala ishindegi bos keńistikterge gúlder egildi, asfalt tóseldi. Osylaısha, qysyr ósek-aıańdar sıreı bastady (...) El astanasyn aýystyrý arqyly ózimniń saıasattaǵy keleshegimdi qaterge tigip otyrǵanymdy túsindim. Biraq, iske kirisip kettik. Aqmolaǵa aı saıyn baratynmyn, áýejaıdan tike qurylys nysandaryna bet alatynmyn», - dep eske aldy Nursultan Nazarbaev.
Suhbattyń tolyq mátinin «Kazahstanskaıa pravda» gazetinen oqýǵa bolady.
