Nursultan Nazarbaev: Men qazaqstandyq kostıýmmen, sender Brioni-men otyrsyńdar

ATYRAÝ. QazAqparat - Atyraý oblysynyń áleýmettik-ekonomıkalyq damý məseleleri jóninde keńeste Memleket basshysy Nursultan Nazarbaev qazaqstandyqtardy otandyq jeńil ónerkásip ónimderin alýǵa shaqyrdy, dep habarlaıdy QazAqparat tilshisi.

«Biz osy jyldardyń ishinde otandyq jeńil ónerkásipti joǵaltyp aldyq. Ózimizde tigiletin kostıýdi qansha kıip júrsem de, barlyqtaryń myna jerde Brıonımen otyrsyńdar. Qazaqstanda tigiletin kostıýmder odan jaman emes», -dedi Nursultan Nazarbaev.

Memleket basshysy ıtalııalyq bul brend 5-6 myń dollar bolsa, qazaqstandyq ónim odan birneshe ese arzan ekendigin ári kııýge de bolatynyn basa aıtty.

«Men senderge aıtaıyn, biz qazaqpyz ǵoı. Jas kezimizde ash-jańalash júrip óstik. Kórmegendi kórdik, bizdiń áke-sheshelerimiz túk kórgen joq. Túk kórmegendikten qaltamyzǵa aqsha túsip edi, barlyǵymyz dáý mashına aldyq, úsh qabatty úı saldyq. Qazir sol jigitter úılerin ne isterin bilmeı, sata almaı júr. 3-4 qabatty úıge eki balasymen turý degen qandaı masqara. Ony kúnde tazalaý kerek, qaraıtyn adam kerek. Bastapqy kezde solaı jasadyq. Batysta baı adamdar óziniń baı ekenin eldiń aldynda kórsetpeıdi. Naǵyz baı adamdar solaı bolady. Al bizdiki «meniń mashınam ananikinen jaqsy, úıim bıik» dep kórsetýi kerek. Bul naǵyz saýatsyzdyq sanalady. «Ulyq bolsań, kishik bol», dep qazaq nelikten aıtqan? Baılyqty bireý kóredi, bireý kóre almaıdy», - dedi Elbasy.

Nursultan Nazarbaev búgingi qazaqtyń baılary memleket júrgizip otyrǵan saıasattyń arqasynda dáýletti bolǵanyn aıtty. Sonymen qatar olardy týǵan aýyldaryn baryp áleýmettik nysandar salýǵa qarjy salýǵa úndedi.