Nursultan Nazarbaev memlekettik basqarý isine qatysty pikir bildirdi
ASTANA. QazAqparat - KTK telearasynda kórsetilgen «25 kz. Jańa tarıh» derekti fılminde Qazaqstan Prezıdenti Nursultan Nazarbaev memlekettik basqarý túri jaıynda pikir bildirdi, dep habarlaıdy QazAqparat.
«Bizde basqarýdyń prezıdenttik túri. Konstıtýtsııada basqarýdyń prezıdenttik nysanyndaǵy respýblıka dep jazylǵan. Frantsýzdyq prezıdenttik bılik birshama qatańdaý. Bizde qandaı bar, sondaı. Ony ártúrli aıtyp jatady, dıktatorlyq nemese avtokrattyq deıdi. Bul bizdiń jaǵdaıymyzdy, bizdiń ómirimizdi, jalpy gazetten ǵana oqyp, eshteńeni de bilmeıtinderdiń myljyń sózi. Sondyqtan da bizdiń elimiz úshin bizdiń búgingi bılik durys», - dedi Elbasy.
Memleket basshysy jaǵdaı ózgerer bolsa basqa satyǵa kóshetindigimizdi de basa aıtady. «Sondyqtan da ekonomıkany nyǵaıtý, orta tapty kóterý qajettigin taǵy da bir márte aıtqym keledi. Sodan keıin el turaqty bolýy, damýy jáne onyń menshigi saqtalýy úshin alǵa qaraı ilgerileý kerek», - dedi Prezıdent.
Sonymen qatar Ult kóshbasshysy Konstıtýtsııaǵa jeke menshikke qol suǵylmaıtyndyǵy jazylý kerektigin atap ótti.
«Bizge Konstıtýtsııaǵa jeke menshikke qol suǵylmaıtyndyǵy týraly tarmaq qosatyn ýaqyt jetti. Eshkim de adamnyń jeke menshigine qol suǵa almaıdy. Meniń jeke páterime, meniń jeke úıime eshkimde ruqsatsiz kire almaıdy. Olaı bolmasa beıberekettik oryn alady. Kúshtiler álsizderdiń qolynda baryn tartyp alatyn bolady», - dedi Nazarbaev.
