Nursultan Nazarbaev: Maqsatqa jetý úshin sana jańǵyrýy kerek
ASTANA. QazAqparat - Jýyrda Memleket basshysy Nursultan Nazarbaev Prezıdent janyndaǵy qoǵamdyq sanany jańǵyrtý baǵdarlamasyn iske asyrý jónindegi ulttyq komıssııany qurý týraly Jarlyqqa qol qoıdy.
Ulttyq komıssııanyń quramyna Prezıdent Ákimshiligiń jetekshisi Ádilbek Jaqsybekov (tóraǵasy), Prezıdent Ákimshiligi basshysynyń birinshi orynbasary Marat Tájın (tóraǵanyń orynbasary), Premer-Mınıstr Keńsesiniń basshysy Nurlan Aldabergenov (tóraǵanyń orynbasary), Іshki saıasat bóliminiń meńgerýshisi Aıda Balaeva (hatshysy) kirdi. Komıssııa músheleriniń tiziminde - mınıstrler, Astana jáne Almaty qalalarynyń, oblystardyń ákimderi, Parlament depýtattary, saıası partııalardyń jetekshileri, joǵary oqý oryndarynyń rektorlary, memlekettik mekemeler men ǵylymı ınstıtýttardyń basshylary, qoǵamdq birlestikter men BAQ-nyń ókilderi bar.
Memleket basshysy rýhanı sanany jańǵyrtý týraly óziniń oılaryn «Bolashaqqa baǵdar: rýhanı jańǵyrtý» atty maqalasynda jarııa etkeni jurtqa málim. Ol myqty, ári jaýapkershiligi joǵary birtutas ult bolý úshin bolashaqqa qalaı qadam basatynymyzdy, buqaralyq sanany qalaı ózgertetinimiz týraly kózqarasyn ashyq bildirdi. «Maqsatqa jetý úshin bizdiń sanamyz isimizden ozyp júrýi, ıaǵnı, odan buryn jańǵyryp otyrýy tıis»,- dep jazdy. Ult kóshbasshysy óz maqalasyndaǵy «XXI ǵasyrdaǵy ulttyq sana týraly» dep atalǵan alǵashqy bóliminde sanany jańǵyrtýdyń ulttyq-rýhanı tamyryzdan nár alýy kerektigin qadap aıtty. «Ájeptáýir jańǵyrǵan qoǵamnyń óziniń tamyry tarıhynyń tereńinen bastaý alatyn rýhanı kody bolady. Jańa turpattaǵy jańǵyrýdyń eń basty sharty - sol ulttyq kodyńdy saqtaı bilý. Onsyz jańǵyrý degenińizdiń qur jańǵyryqqa aınalýy op-ońaı»,- dep túsindirdi óziniń negizgi oıyn Nursultan Nazarbaev. Osy bólimde Elbasy tutas qoǵamnyń jáne árbir qazaqstandyqtyń sanasyn jańǵyrtýdyń birneshe baǵytyn atap kórsetti.
Sol baǵyttardyń biri - ulttyq biregeılikti saqtaý. Májilis depýtaty Omarhan Óksikbaevtyń paıymdaýynsha, ulttyq sana-sezim kókjıegin keńeıtemiz desek, ulttyq tamyrymyzdy joǵaltpaýymyz kerek. «Ulttyq tamyr degenimiz - óz dástúrimizben jalǵasatyn dúnıe. Bizge atam zamannan beri ata jolymen, ana sútimen qanymyzǵa sińgen nárseniń bári osyǵan jatady. Ulttyq dástúrimizden aırylsaq - qazaqylyqtan aırylamyz. Túp-tamyrymyz salt-dástúrlerimizben qalyptasqanyn umytpaǵanymy abzal»,- deıdi ol. Omarhan Nurtaıuly ulttyq biregeılikti saqtaýdy árkim ózi otbasynan bastaý kerektigin aıtady. «Mysaly, ózim jas kúnimde ata-ájemnen kórgen ulttyq dástúrlerdi berik ustanamyn. Mysaly, Ulystyń uly kúni - Naýryz meıramyn otbasymda qarsy alýǵa erekshe kóńil bólemin. Óz balalarym otaý kótergende nemese nemerelerim týǵanda da ulttyq dástúrge saı rásimder jasaımyz. Ulttyq kolorıt, ulttyq kod degenimiz osy. Muny basqalarǵa da tileımin»,- deıdi depýtat.
Fılosofııa ǵylymdarynyń kandıdaty, dintanýshy maman Jalǵas Sádýaqasuly: «Ulttyq kod - ulttyń qýaty. Ulttyq qundylyqtar degende atadan balaǵa mıras bolyp kele jatqan, ana sútimen boıǵa daryǵan rýhanı qundylyqtardy, ımandylyq pen ınabattylyqty, qazaqshylyqty aıtpaq hám úıretpek kerek. Qazaq muny atadan balaǵa mıras etip qaldyryp otyrǵan»,- deıdi.
