Nursultan Nazarbaev qyzdarǵa bolashaq jar tańdaýda keńes berdi
ASTANA. QazAqparat - Búgin Aqordada Qazaqstannyń áıelder qaýymy ókilderimen ótken «Kóktem shýaǵy» atty kezdesý barysynda Elbasy Nursultan Nazarbaev qyzdarǵa bolashaq jar tańdaýda keńes berdi, dep habarlaıdy QazAqparat.
«Otbasy ınstıtýtyn nyǵaıtý qajet etiledi. Bul tek bizdegi ǵana emes búkil álemdegi problema. Tipti Eýropanyń ózinde árbir ekinshi, al qazirgi zamanǵy Qazaqstanda árbir úshinshi neke buzylady. Ajyrasýlardyń 45 paıyzyna jubaılardyń jaýapkershilikke daıyn bolmaýy sebep. Shyǵys bıleýshileri kezinde laıyqty otbasy qurý saltanatty saraı salýdan da qıyn dep aıtqan eken. Bul qurylys eshqashan taýsylmaq emes jáne eki tarapqa da baılanysty», - dedi Nursultan Nazarbaev.
Memleket basshysy kúıeýiniń de, áıeliniń de jaýapkershiligi zor bolý tıistigin, bul úshin olar oǵan daıyn bolýy qajettigin basa aıtty. Sonymen qatar Elbasy qyzdarǵa er-azamattardyń qandaı sózderine qulaq túrý kerektigine keńes berdi.
«Senimen qosylyp, bul ómirdiń barlyq qıyndyqtaryn birge ótemin deıtinderdiń sózderin baıyppen qabyldaý qajet. Seniń shashyń ádemi degenderge emes. Óte tanymal aktrısa Faına Ranevskaıa: «Qalaı desek te biz erkekterden aqyldymyz. Biz erkekterdi aıaǵyna qarap tańdamaımyz», degen eken», - dedi QR Prezıdenti.
Aıta keteıik, kezdesýge Májilis depýtaty Zaǵıpa Balıeva, ǵalym-mıkrobıolog Álııa Ernazarova, Ýnıversıada-2017 chempıony Anna Shevchenko, QHA múshesi, aýyl mektebiniń dırektory Irına Sedova, «Jas Atameken» jas kásipkerler klýbynyń prezıdenti Zarına Kókjanova, aqyn Tolqyn Qabylsha, ánshi Marııa Galıtskaıa, «Teńizshevroıl» JShS adam resýrstaryn basqarý bas menedjeri, aýdandyq aýrýhananyń bas dárigeri Qarlyǵash Rázıeva, Ulttyq ekonomıka vıtse-mınıstri Mádına Ábilqasymova, «Astana-Balet» teatrynyń jetekshi balerınasy Mılana Býkanova, kópbalaly ana Oksana Mýkasheva, qobyzdan halyqaralyq baıqaýlardyń laýreaty Aqerke Tájibaeva, Astana qalalyq kámeletke jasy tolmaǵandar isi jónindegi mamandandyrylǵan aýdanaralyq sottyń tóraǵasy Nazılııa Razzak, Abaı atyndaǵy memlekettik akademııalyq opera jáne balet teatrynyń solısi Oksana Davydenko, QR QK Parashıýt daıyndyǵy ortalyǵynyń aǵa mamany Rımma Ramazanova, aktrısa Saltanat Baqaeva, jýrnalıst Venera Mırlanqyzy qatysty.
