Nursultan Nazarbaev qurǵan júıe nátıjeliligin kórsetti – Talǵat Qalıev
Onyń aıtýynsha, kez kelgen másele boıynsha sheshimder naqty ári tez qabyldanady. Bul – Nursultan Nazarbaev qurǵan júıe óz tıimdiligin kórsetip jatqanynyń belgisi.
«Bizge Elbasynyń rólin, onyń Qazaqstan tarıhyna qosqan úlesin obektıvti túrde baǵalaý qıyn. Bılikten óz erkimen bas tartý erlikti, sheshim qabyldaı bilýdi talap etedi. Arada bir jyl ótkennen keıin munyń danalyqqa toly sheshim ekenin kórdik. Byltyrǵy 19 naýryz qazaqstandyqtardyń barlyǵy úshin kútpegen jaǵdaı boldy dep oılaımyn. Degenmen bári konstıtýtsııalyq jolmen boldy: sol kezdegi Senat spıkeri Qasym-Jomart Toqaev Prezıdenttiń mindetin atqarýshy boldy, saılaýǵa tústi. Búgingi tańda biz Nursultan Nazarbaevtyń qurǵan júıesi jaqsy jumys isteıtinine kóz jetkizdik», - deıdi ol.
T. Qalıev atap ótkendeı, sońǵy bir jyl Arystaǵy tótenshe oqıǵa, Bek Air ushaǵynyń apaty, Qordaıdaǵy jaǵdaı, koronavırýs ınfektsııasy sııaqty jahandyq jáne ekonomıkalyq sıpatqa ıe synaqtarǵa toly boldy.
«Bizde berik júıe jumys isteıtinin kórip otyrmyz. Qandaı jaǵdaı bolǵanyna qaramastan memleket senimdi túrde jumys isteýde jáne sheshimder naqty ári jyldam qabyldanady. Demek, Nursultan Nazarbaev qurǵan júıe nátıjesin kórsetip jatyr. Adamnyń psıhologııasy sondaı: ózimen zamandas danyshpandardy moıyndaýy óte qıyn. Olar úshin Abaı, ál-Farabı, Sokrat pen Arıstoteldi moıyndaý áldeqaıda jeńil. Óz aramyzda erekshe tulǵa júrýi múmkin ekenin moıyndaý ońaı emes. Menińshe, Nursultan Nazarbaevtyń baǵasyn keler urpaq beredi. On jyldyqtar ótken soń baǵalaýǵa bolatyn nátıje ǵana qalady», - deıdi spıker.
OKQ dırektory Elbasy táýelsiz Qazaqstanda óshpes iz qaldyrǵanyn, sebebi ol egemen eldiń negizin qalaýshy ekenin aıtyp ótti.
«Nursultan Nazarbev bılikke elge qıyn kezeńde keldi. Qazir 90-jyldary jaǵdaı qalaı bolǵanyn ekiniń biri bile bermeıdi. Keńes odaǵy qulaǵan kezde elimizdi jumyssyzdyq, senimsizdik, qylmys jaılady. Adamdar óz máselesin quqyq qorǵaý organdaryna júginý arqyly emes, «bandıtter» arqyly sheshti. Sol kezeńde olardy teledıdardan kórsetip, suhbat alyp, bedeldi adam sanady. Kóp adam el bolashaǵyna kúmánmen qaraǵan ýaqytta memleket basqaryp, ınstıtýttar qurý ońaı emes edi. Elbasy eldi jappaı daǵdarys kezeńinen alyp shyqty. Bastapqy on jylda ol turǵyn úı-kommýnaldyq sharýashylyq, zeınetaqy júıesi, áleýmettik qamtamasyz etý júıesinde sheshýshi reformalar qabyldady. Muny bzdiń tájirıbemizdi sarapqa salý úshin keletin reseılikter de moıyndady. Qazirgi ýaqytta elimiz jańa syn-qater yqpalynda tur. Búgingi tańda ımport, eksport aǵyny bolmaıdy: óz elimizdi óz betimizben qamtamasyz etýimizge týra keledi. Esterińizde bolsa, bir jyl buryn «Qarapaıym zattar ekonomıkasyn» Nursultan Nazarbaev bastaǵan. Endi ony tolyq meńgerýimiz kerek. Bul halyq úshin óte kerek dúnıe. Qazirgi ýaqytta bizdiń halqymyz úshin turaqtylyq óte mańyzdy», - deıdi Talǵat Qalıev.
Onyń sózinshe, QR Tuńǵysh Prezıdenti kadr daıarlaý máselesine de árqashan kóp kóńil bóldi.
«Mysaly, «Bolashaq» baǵdarlamasy boıynsha 12 myń adam oqydy. Búgingi tańda olar Memleket basshysy Qasym-Jomart Toqaevpen birigip, bılik júıesin jańartýda. Qazrgi ýaqytta jastar kadr rezervi qalyptasty, olar derbes jumys isteı alatyndaryn kórsete alady dep oılaımyn», - deıdi saıasattanýshy.
