Nursultan Nazarbaev Konstıtýtsııanyń 26-babyna qatysty naqty sheshim qabyldaıdy

ASTANA. QazAqparat - Taıaý kúnderi QR Prezıdenti Nursultan Nazarbaev konstıtýtsııalyq reforma aıasynda qoǵamnyń qyzý talqysyna túsken 26-bapqa qatysty naqty sheshim qabyldaıdy. Bul týraly búgin bılik tarmaqtary arasyndaǵy ókilettikti qaıta bólý jónindegi jumys tobynyń otyrysynan keıin BAQ ókilderine suhbat bergen Qazaq gýmanıtarlyq zań ýnıversıteti Azamattyq-quqyqtyq zertteýler ǵylymı-zertteý ınstıtýtynyń dırektory Tólesh Qaýdyrov málim etti, dep habarlaıdy QazAqparat.

«Bir aıǵa sozylǵan konstıtýtsııalyq reformalardy talqylaý protsesi búgin aıaqtaldy. Jobany bastan-aıaq qaıta qarap shyqtyq. Komıssııa músheleri biraýyzdan jobanyń 99 paıyzyn qabyldady dep aıtýǵa bolady. Atyshýly 26-bapqa baılanysty sońǵy sheshim qabyldanǵan joq. Oǵan qatysty Prezıdentimizdiń sheshimi bolady. Osydan keıin qujat Parlamentke engiziledi»,- dedi ol.

Onyń atap ótýinshe, el azamattarynan konstıtýtsııalyq reformaǵa baılanysty 6 myńnan astam usynys kelip túsken. Olar Konstıtýtsııanyń 98 babynyń 63 babyna qatysty boldy.

«Usynystar jan-jaqty. Úkimettiń qyzmetinen bastap, quqyq qorǵaý organdarynyń, sottardyń jastaryna qatysty da máselelerge halyq qyzyǵýshylyq tanytqan. El boıynsha ártúrli deńgeıdegi 200-den astam otyrys ótti. Jalpy, 2 myń adam túsindirý jumystaryna atsalysty.

Konstıýtsııalyq reforma qoǵam óklderiniń zor qyzyǵýshylyǵyn týyndatty dep aıtýǵa bolady», - dedi Qaýdyrov.

Sonymen qatar ol BAQ ókilderiniń 26-bapqa qatysty naqty sheshim qashan qabyldanady degen saýalyna da jaýap berdi.

«Prezıdent búgin ne erteń 26-bapqa qatysty óz sheshimin shyǵarady. Elbasynyń paıymynsha, birinshi kezekte halyqtyń pikirin, kózqarasyn eskerý qajet. Konstıtýtsııa 100 paıyzdyq kelisimniń nátıjesi bolýy tıis. Menińshe, búkil halyqtyń rızashylyǵyn týdyratyn sheshim qabyldanady»,- dedi ınstıtýt dırektory.