Nursultan Nazarbaev: Qazaqstannyń ózine tán saıası modeli - turaqty prezıdenttik bılik saqtalady
«Jańa jaǵdaıda Parlamentke, Úkimetke, barlyq atqarýshy organdarǵa zor jaýapkershilik júkteledi. Saıası jańǵyrtý konstıtýtsııalyq reformalar arqyly naqty júzege asyrylatyn bolady. Bir aıqyn másele - Qazaqstannyń ózine tán saıası modeli, ıaǵnı turaqty prezıdenttik bılik saqtalady. Sonymen birge Parlament pen Úkimettiń ókilettikteri neǵurlym keńeıip, olardyń róli arta túsedi. Ózimniń tájirıbeme súıene otyryp aıtaıyn, ókilettikti tıimdi qoldanýdyń ózi asqan óner. Bizdiń prezıdenttik bılik jaıynda osy jyldardyń ishinde ózimizde de, syrtta da neshe túrli sóz aıtylǵanyn bilemiz. Biraq ta, biz eń aldymen ózimizge, qazaqstandyqtarǵa, halqymyzǵa ne kerek, sonymen júrdik. Osy naǵyz durys jol. Bul qajyrly eńbek pen yjdaǵattylyqty qajet etedi», - dedi Prezıdent.
Memleket basshysy saıası jańǵyrýdyń tehnologııalyq jańǵyrýmen qatar qolǵa alynýy aıryqsha mańyzdy ekendigin basa aıtty.
«Olar birin-biri kúsheıte, tolyqtyra túsýi qajet. Konstıtýtsııalyq reforma 5 saladan turatyn ult josparymen jáne jaqynda jarııalanǵan úshinshi jańǵyrýmen qatar júzege asyrylýy tıis. Bir-birimen jalǵasyp jatady. Meniń Joldaýymda aıtylǵan mindetter zań shyǵarýshy, atqarýshy organdarǵa erekshe jaýapkershilik artady. Jańa jahandyq jaǵdaıda memlekettiń strategııalyq baǵdary ózgermeıdi. Bizdiń mejemiz damý kóshiniń basyndaǵy 30 eldiń qatarynda bolý. Negizgi maqsat - sol. Saıası jáne tehnologııalyq jańǵyrýdyń maqsaty da osy», - dedi Nursultan Nazarbaev.
Aıta keteıik, Qazaqstan halqy el Konstıtýtsııasyna bılik tarmaqtary arasyndaǵy ókilettikterdi qaıta bólý máselesi boıynsha engiziletin túzetýlerdi qoldady. Bul týraly 1 naýryzda Aqordada ótken bılik tarmaqtary arasyndaǵy ókilettikterdi qaıta bólý jónindegi jumys tobynyń kezekti otyrysynda Elbasy Nursultan Nazarbaev málim etken edi.
Memleket basshysy bul máselesiniń mańyzylyǵy eskerile otyryp, jumys toby ázirlegen Konstıtýtsııaǵa engiziletin túzetýler jobasy búkilhalyqtyq talqylaýǵa shyǵarylǵanyn basa aıtqan edi.
«Biz birinshi otyrysta talqyladyq. Men talqylaýlar barysyn tyńǵylyqty qadaǵalap otyrdym jáne onyń maqsatyna qol jetkizilgendigin aıta alamyn. Halyq talqylaýy barysynda negizinen biz engizgen ózgertýler qoldaý tapty. Búgin biz azamattardan kelip túsken usynystar men pikirlerdi qaraımyz, qorytyndysyn shyǵaryp, odan ary ne isteýimiz kerektigi jaıynda sheshim qabyldaımyz», - dedi Prezıdent.
