Nursultan Nazarbaev Qazaqstandy álemge, al álemdi Qazaqstanǵa ashyp berdi - «Isaakıev soborlarynyń» dırektory
ASTANA. QazAqparat - Nursultan Nazarbaev Qazaqstandy álemge, al álemdi Qazaqstanǵa ashyp berdi. Sankt-Peterbordaǵy «Isaakıev soborlary» memlekettik murajaı-eskertkishiniń dırektory Nıkolaı Býrov osyndaı pikir aıtty.
«Shırek ǵasyrǵa jeter-jetpes ýaqyttyń ishinde álem boıynsha joǵary b edelge ıe bolǵan Qazaqstan Prezıdenti Nursultan Nazarbaev qurlyqtyń qaq ortasynan aýqatty da aýqymdy eldiń jańa elordasyn - saltanaty men sáni jarasymdy Astanany saldy. Astanany salyp jatyp, ol myqty, qarqyndy jáne búkil dúnıejúzine ashyq eldiń bolashaǵyn kórdi. Ol Qazaqstandy álemge, al álemdi Qazaqstanǵa ashyp bergen tulǵa. Astana memlekettiń jarqyn bolashaǵynyń sımvolyna aınaldy», - dedi ol búgin QR Tuńǵysh Prezıdenti murajaıynyń 10 jyldyǵana arnalǵan «Qazirgi qoǵamdaǵy Mýzeı. Jańa damý joldaryn izdestirý» halyqaralyq ǵylymı-tájirıbelik konferentsııasynda.
Onyń sózine qaraǵanda, QR Tuńǵysh Prezıdentiniń murajaıy barsha álemnen ákelingen qundy jádigerlerdi saqtaýda.
«Murajaı keremet. Ol jas, degenmen soǵan qaramastan, «aqyldy» ári zamanaýı. Murajaıdyń ishi ǵalamat energetıkaǵa toly. Túrli memleket basshylary syıǵa tartqan óte qundy eksponattar meniń kóńilime erekshe qyzyǵýshylyq darytty. Menińshe, kezinde solardyń eshbirin joǵaltpaı, osynda saqtaý jónindegi sheshim óte durys qabyldanypty», - deıdi N.Býrov.
Bunyń aldynda habarlanǵanyndaı, Qazaqstan Respýblıkasynyń Tuńǵysh Prezıdenti murajaıynyń 10 jyldyǵyna oraı «Qazirgi qoǵamdaǵy Mýzeı. Jańa damý joldaryn izdestirý» halyqaralyq ǵylymı-tájirıbelik konferentsııasy ótken bolatyn. Halyqaralyq ǵylymı-tájirıbelik konferentsııa jumysyna Qazaqstan Respýblıkasynda akkredıttelgen dıplomatııalyq ókildikterdiń, memlekettik organdardyń, alys jáne jaqyn shet memleketterdiń ǵylymı jáne murajaı qaýymdastyǵynyń ókilderi qatysty.
