Nursultan Nazarbaev: Qazaqstanda týrızmdi damytatyn 10 nysan irikteldi

ASTANA. QazAqparat - Elbasy Nursultan Nazarbaev otandyq BAQ ókilderine bergen suhbaty barysynda elimizdiń qaı óńirinde týrızm qarqyndy damytylatyndyǵyn aıtty, dep habarlaıdy QazAqparat tilshisi.

«Týrızm dúnıedegi ekonomıkanyń úlken salasynyń biri. Dúnıejúzi ekonomıkasynyń 10 paıyzy týrızmde jatyr. Al, bizde onsha damymaǵan. Endi qolǵa alynyp jatyr. Bıyl eldiń bári kórsin dep, ádeıi Alakólge bardym. Adamdar óte kóp, salynyp jatqan 4-5 juldyzdy bir-eki qonaq úı bar. Týrızm bolýy úshin aldymen jol kerek. Almatydan Taldyqorǵan arqyly Alakólge deıin jol bar. Sol arqyly halyqtyń barlyǵy baryp jatyr», - dedi N.Nazarbaev.

Sonymen qatar Memleket basshysy Balqash kóli elimizdiń dál ortalyǵynda ornalasqanyn jáne onyń Ystyqkólden esh kem emestigin atap ótti.

«Biraq, ınfraqurylymy joq. Oǵan qonaq úı salyndy. Munan keıin, Almaty oblysy týrızm úshin tartymdy.  Túrkistanda da týrızm úshin qonaq úıler salyp jatyrmyz. Áýejaıy, joldary jóndeletin bolsa, el barady. Kókshetaýda «bes juldyzdy» bir qonaq úı bar. Kottedjder salynýda. Reseıden de adamdar kóp keledi. Soltústik Qazaqstanda Shalqar-Imantaý  degen kól bar. Ol Býrabaıdan da ádemi», - dedi Elbasy.

Nursultan Nazarbaev Aqtaýda Túrkııadan kem emes demalys oryndaryn salýǵa bolatyndyǵyn da basa aıtty.

«Kaspııde sýǵa shomylý maýsymy 4-5 aıǵa sozylady. Mundaı Túrkııada da joq. Ystyqkólde bir aı ǵana. Qazir Aqtaýda áýejaı da bar. Qalany áýejaıǵa qaraı ósiretin bolamyz, jańa qala salynady. Jaǵalaýynyń barlyǵy el demalatyn jerler, qonaq úıler, kottedjder bolady. Oǵan týrıstik jaǵynan qaraǵan emespiz. Sebebi jol bolǵan joq. Qazir mine, Astanadan barlyq jaqqa - ońtústikke, soltústikke, shyǵysqa, batysqa salyp jatyrmyz. Qazir týrızmdi damytatyn 10 nysan tańdap aldyq, onyń ishinde Aqtaý, Almaty, Kaspııdiń jaǵalaýy, Ońtústik Qazaqstan, Baıanaýyl bar», - dedi Nursultan Nazarbaev.