Nursultan Nazarbaev: Qazaqstan - atom qarýyna qarsy kúreste búkil elderdiń kóshbasshysy
«1991 jyldyń 29 tamyzynda dúnıe júzindegi alapat ıadrolyq synaq polıgony meniń Jarlyǵymmenen jabylǵan bolatyn. 1949 jyldan bastap Sovet odaǵy kezinde 465 atom qarýyn jaryp, halqymyzǵa zardap ákelgen úlken zulmatty toqtattyq. Sodan beri, minekeı, bizdiń istegen sharýamyzdy dúnıe júzi baǵalap, Birikken Ulttar uıymynyń aldynda dúnıejúzi halyqtarynyń atom qarýyna qarsy is-sharasy kúni dep qabyldandy. Sondyqtan, biz úshin bul - mereke. Bul Qazaqstanǵa, qazaqqa bergen dúnıe júzi qaýymdastyǵynyń úlken baǵasy dep sanaý kerek», - dedi Nursultan Nazarbaev.
Prezıdent ekinshiden, Konstıtýtsııamyzdyń kúni osy sharamen tuspa-tus kelip otyrǵanyn eske saldy.
«Sondyqtan, elimizdiń atom qarýyna qarsy búkil elderdiń kóshbasshysy ataǵy bar. Ony biz oryndap kele jatyrmyz. Astanamyz kóp halyqaralyq uıymdardyń kezdesetin, máselelerin sheshetin jerine aınaldy. Endi, minekeı, búgin mynadaı úlken monýment ashaıyn dep otyrmyz. Aqtóbelikterdiń Astananyń 20 jyldyǵyna jasaǵan syılyǵy bul. Monýmenttiń sımvoly - «Atom qarýyna qarsy kúresý qajet». Biz osylaı dep adamzatqa jar salamyz. Keler urpaqqa ótkenniń taǵylymyn umytpańdar dep osyndaı úlgi qaldyramyz», - dedi Memleket basshysy.
Eske sala ketsek, Aqtóbe oblysy Astananyń 20 jyldyǵyna «Beıbitshilik qabyrǵasy» monýmentin syıǵa tartty. Monýmenttiń ashylý saltanatyna Memleket basshysy Nursultan Nazarbaev qatysty.
