Nursultan Nazarbaev: Qazaq qara kıimdi qaraly kezde ǵana kıedi
Bul bizdiń dástúrimizge de, halqymyzǵa da jat. Buǵan zańnamalyq deńgeıde tyıym salý máselesin pysyqtaý kerek. Qazaq qara kıimdi qaraly kezde ǵana kıedi»,-dep málimdedi Memleket basshysy Nursultan Nazarbaev Qazaqstan musylmandary dinı basqarmasynyń ókilderimen kezdesýi kezinde. Elbasy osy jıynda qazaq mádenıetiniń tarıhyna, qazaq áıelderiniń dástúrli kıimine toqtalyp, qara kıim men dinniń arasynda eshqandaı baılanys joq ekenin aıtty.
Eske sala keteıik, jaqynda Memleket basshysy Nursultan Nazarbaev Prezıdent janyndaǵy qoǵamdyq sanany jańǵyrtý baǵdarlamasyn iske asyrý jónindegi ulttyq komıssııany qurý týraly Jarlyqqa qol qoıdy. Ulttyq komıssııanyń quramyna Prezıdent Ákimshiligiń jetekshisi Ádilbek Jaqsybekov (tóraǵasy), Prezıdent Ákimshiligi basshysynyń birinshi orynbasary Marat Tájın (tóraǵanyń orynbasary), Premer-Mınıstr Keńsesiniń basshysy Nurlan Aldabergenov (tóraǵanyń orynbasary), Іshki saıasat bóliminiń meńgerýshisi Aıda Balaeva (hatshysy) kirdi. Komıssııa músheleriniń tiziminde - mınıstrler, Astana jáne Almaty qalalarynyń, oblystardyń ákimderi, Parlament depýtattary, saıası partııalardyń jetekshileri, joǵary oqý oryndarynyń rektorlary, memlekettik mekemeler men ǵylymı ınstıtýttardyń basshylary, qoǵamdyq birlestikter men BAQ-nyń ókilderi bar.
Maqalamyzdyń basyndaǵy qara kıim, hıdjab kııý degen máselege oralaıyq. Jýyrda «Astana» telearnasyna suhbat bergen Din isteri jáne azamattyq qoǵam mınıstrliginiń ókili Baqyt Kúlekeev «Elimizde jyl sońyna deıin hıdjab kııýge tyıym salynýy múmkin» degen ashyq pikir aıtty. «Elbasymyzdyń aıtylǵan sózinen keıin tıisti tapsyrma keledi. Qazirdiń ózinde bul máselege biz kóńil aýdaryp, zertteýdemiz. Tyıym salyna ma? Qandaı túrde, qandaı deńgeıde salynady? Onyń barlyǵyn oılastyrý kerekpiz. Áýeli zańnamalyq ózgeristerdi qaraımyz. Memlekettik organdardyń pikirin jınaqtaımyz, sodan soń zańnamaǵa da ózgerister enýi múmkin»,- dedi ol.
Aıtpaqshy, Qazaqstan musylmandary dinı basqarmasy da «paranja men qara kıim - saltymyzǵa qaıshy keledi» degen ustanymyn jarııa etti. «Qazaqstan musylmandary dinı basqarmasy elimizdegi musylman qyz-kelinshekter men áıelderdi kıim kııý úlgisinde sharıǵat talaptaryn saqtaı otyryp, qazaq halqynyń salt-dástúrlerin eskerip, jınaqy kıinýge keńes beredi. Kózge ersi kórinetin, dene bitimin aıqyndaıtyn, qara tústi kıim-keshekterdi paıdalanbaǵan durys. Al paranja (nıqab) men qara kıim kııý - saltymyzǵa qaıshy, bul ata-babalarymyzdyń joly emes»,- delingen quzyrly basqarma taratqan málimdemede.
Kórnekti dıplomat, ıslamtanýshy ǵalym, Qazaqstan Respýblıkasynyń Birikken Arab Ámirlikterindegi tótenshe jáne ókiletti elshisi Qaırat Lama-Sharıf qazir hıdjab kıip júrgen qyz-kelinshekterimizdiń ózderi sol kıimniń sharıǵatqa eshqandaı da saı kelmeıtinine kóz jetkizip, ózderi sheshýi kerektigin aıtady. «Eshqandaı zań shyǵarýdyń, tyıym salýdyń qajeti joq. Bul tek kúshti nasıhat arqyly, oı salý arqyly jetkizetin dúnıe. Sebebi din degenimiz - sózben túsindirý»,- deıdi ol.
