Nursultan Nazarbaev Qara jáne Kaspıı teńizderin sý jolymen jalǵaýdy usyndy

SOChI. QazAqparat - Qazaqstan Prezıdenti Nursultan Nazarbaev Joǵary Eýrazııalyq ekonomıkalyq keńestiń kezekti otyrysynda uıym aıasyndaǵy ekonomıkalyq yntymaqtastyqty odan ári nyǵaıtýǵa baǵyttalǵan birqatar máseleni kóterdi, dep habarlaıdy QazAqparat tilshisi.

Qazaqstan Prezıdentiniń atap ótýinshe, eń birinshiden buǵan deıin qabyldanǵan sheshimderdiń oryndalýyn saralap, keshendi sharalar ázirleý úshin odaqqa múshe elderdiń arnaıy úkimetaralyq jumys tobyn qurý qajet. Jumys toby shekarada, sonymen qatar ekonomıkanyń salalary arasyndaǵy saýdaǵy kedergilerdi anyqtaý tıis.

«Ekinshiden, qazirgi sanktsııa yqpalyndaǵy kúrdeli jaǵdaılardy eskere otyryp, bizge odan ári qalaı jumys isteý kerektigin qarastyrý qajet. Baılanystardy odan ári damý jáne tereńdetý deklaratsııasy týraly usynys engizildi. Osy jumystar biz osy ýaqytqa deıin ne istegendigimizdi túsingen kezde ǵana júrgizilýi tıis. Eger biz barlyǵyn oryndaǵan bolsaq, onda qatynastardy tereńdetý jaıynda aıtýǵa bolady», - dep atap ótti Nursultan Nazarbaev.

Úshinshiden, Qazaqstan Prezıdenti iri ınfraqurylymdyq megajobalardy júzege asyrý múmkinshilikterin qarastyrý qajettigine nazar aýdardy.

«Oǵan Eýropa men Azııany Reseı jáne Qazaqstan arqyly jalǵaıtyn «Eýrazııa» joǵary jyldamdyqty temir jol magıstrali jobasy jatady. Kelesi keleshegi zor joba Qara jáne Kaspıı teńizderin sý jolymen baılanystyrýǵa múmkindik beretin «Eýrazııa keme arnasy qurylysy bola alar edi. Bul, árıne, iri jobalar. Biraq, biz olardy qolǵa alýǵa tıispiz. Basqasha sózben aıtar bolsaq, Eýrazııalyq ekonomıkalyq odaq ınfraqurylymy Azııa men Eýropanyń, Shyǵys pen Batystyń, Tynyq jáne Atlant muhıttarynyń arasyndaǵy jaqsy kópir bola alady», - dedi Qazaqstan Prezıdenti.

Tórtinshiden, Nursultan Nazarbaev EAEO qyzmetinde Eýrazııalyq damý banki men Eýrazııalyq turaqtandyrý jáne damý qorynyń rólin arttyrý qajettigin basa aıtty.

«Olar iri jobalardy júzege asyrýǵa belsendi túrde qatysýy kerek», - dep túıindedi sózin Nursultan Nazarbaev.

Aıta keteıik, Reseıdiń Sochı qalasynda memleket basshylarynyń qatysýymen Joǵary Eýrazııalyq ekonomıkalyq keńestiń (JEEK) kezekti otyrysy ótýde. Sharaǵa Qazaqstan Prezıdenti Nursultan Nazarbaev, Reseı basshysy Vladımır Pýtın, Qyrǵyzstan prezıdenti Sooronbaı Jeenbekov, Belarýs basshysy Aleksandr Lýkashenko jáne Armenııa Premer-Mınıstri Nıkol Pashınıan qatysýda.  Basqosýda Eýrazııalyq ekonomıkalyq odaq (EAEO) aıasyndaǵy kópbaǵytty yntymaqtastyqtyń túrli aspektileri, uıymnyń uıymdastyrý-kadrlyq baǵyttaǵy sharalary men aǵymdaǵy jumys barysy sóz bolady dep kútiledi. Kún tártibine 15 másele qoıylǵan. Olardyń ekeýi shaǵyn quramda qaralady.