Nursultan Nazarbaev qandaı uıaly telefon ustaıtynyn aıtty

HELЬSINKI. QazAqparat - Qazaqstan Prezıdenti Nursultan Nazarbaev Fınlıandııaǵa resmı sapary aıasynda Nokıa kompanııasy Dırektorlar keńesiniń tóraǵasy Rısto Sıılasmaamen kezdesti, dep habarlaıdy QazAqparattyń arnaýly tilshisi Helsınkıden.

«Nokıa» búkil álemge tanymal, kezinde dúrliktirdi. Qıyn kezeńde de kompanııany alyp shyqtyńyz. Áli kúnge deıin «Nokıa» telefonyn qoldanamyn, moıyndaımyn.  Ol eń durys telefon dep sanaımyn», - dep ázildedi Nursultan Nazarbaev.

Memleket basshysy 2007 jyldan bastap «Nokıa» Qazaqstanmen jumys istep kele jatqanyn atap ótti. Sonymen qatar búginde bul kompanııa aktıviniń 23 mlrd dollarǵa deıin kóterilgendigin atap ótken Elbasy Rısto Sıılasmaadan Qazaqstanmen yntymaqtastyqta qandaı jospary bar ekenin surady.

«Prezıdent myrza, Fınlıandııaǵa qosh keldińiz. Siz Nokıany álemde eń tanymal dep atadyńyz. Degenmen, Sizde álemde óte tanymal ári tehnologııalar qundylyǵyn jete túsinetin eleýli Memleket basshylarynyń birisiz. Sizdiń tsıfrlyq tehnologııalarǵa jiti nazar aýdaratyndyǵyńyzdy óte jaqsy bilemin», - dedi óz kezeginde Rısto Sıılasmaa.

Nursultan Nazarbaev elimizde «Tsıfrlyq Qazaqstan» baǵdarlamasy jan-jaqty qolǵa alynyp, iri kásiporyndarda, áleýmettik nysandarda engizilip jatqanyn, osy oraıda «Nokıa» kompanııasymen yntymaqtastyqtyń tıimdi tustary kóp ekenin atap ótti.

 «Nokıa» basshysy Qazaqstannyń «Tsıfrlyq Qazaqstan» baǵdarlamasyn tyńǵylyq zerdelegendikterin jáne yntymaqtastyqqa daıyn ekendigin jetkizdi.

«Óıtkeni, bul Nokıanyń basty maqsaty sanalady. Biz qosalqy bólshekterden bastap naqty ónimge deıingi tolyq tsıkldi óndiremiz. Búginde álemde mundaı tolyq tsıkldi jolǵa qoıǵanymen eki-aq kompanııa maqtana alady. Onyń biri Qytaıdyń «Hýaveı» kompanııasy jáne «Nokıa». Prezıdent myrza, bizdiń jańa josparymyz jaıynda suraǵan edińiz, ol 5G jelisimen tikeleı baılanysty», - dedi fın kompanııasynyń basshysy.

Aıta keteıik, Nokia Corporation uıaly telefondar, uıaly telefondar men planshetterge arnalǵan baǵdarlamalar, sonymen qatar keńjolaqty jáne ІR-jeliler úshin telekommýnıkatsııalyq jabdyqtar shyǵarýmen aınalysatyn fınniń transulttyq kompanııasy sanalady. 1998 jyly «Nokıa» uıaly telefondar salasynda álemdik kóshbasy retinde tanyldy.

 Aıta keterligi, 1996 jyldan 2001 jylǵa deıingi aralyqta kompanııanyń qarjylyq aınalymy 6,5 mlrd eýrodan 31 mlrd eýroǵa deıin artty. 2011-2012 jyldary kompanııanyń uıaly telefondardyń jahandyq naryqtaǵy úlesi  shamamen 30 paıyzdy qurady. Búginde «Nokıa» ǵylymı-zertteý jumystaryna den qoıyp otyr. Onyń zertteý ortalyqtary álemniń 16 elinde ornalasqan. Búginde qyzmetkerleriniń sany 100 myńnan asyp jyǵylady.