Nursultan Nazarbaev Islam damý bankiniń prezıdentimen kezdesti
Qazaqstan Prezıdenti Astanada ótip jatqan Islam yntymaqtastyǵy uıymynyń ǵylym jáne tehnologııalar jónindegi birinshi sammıtine qatysqany úshin Islam damý bankiniń prezıdentine rızashylyq bildirdi.
«Islam damý bankimen yntymaqtastyǵymyz jyl saıyn nyǵaıa túsýde. Búgingi sammıt «EKSPO-2017» halyqaralyq kórmesiniń ótýimen tuspa-tus kelip otyr. Bul kórmeniń taqyryby - jańa energetıka. Onda barlyq elderdiń osy saladaǵy jetistikteri kórsetildi», - dedi Nursultan Nazarbaev.
Memleket basshysy kórme jumysy aıaqtalǵan soń onyń ornynda Halyqaralyq qarjy ortalyǵy jumys isteıtinin, onyń qyzmeti aǵylshyn quqyǵyna negizdeletinin atap ótti.
«Biz kóptegen damyǵan elderdiń osy saladaǵy qyzmetine taldaý jasap, bul ortalyqtyń jumysyn Dýbaıdaǵy qarjy ortalyǵynyń úlgisi boıynsha qalyptastyrýdy uıǵardyq. Islam damý banki osy jumystarǵa tikeleı atsalysady dep úmittenemin», - dedi Qazaqstan Prezıdenti.
Islam damý bankiniń prezıdenti qonaqjaılyq kórsetkeni úshin Memleket basshysyna jáne Qazaqstan halqyna alǵys aıtty.
«Biz osyndaı aýqymdy is-sharaǵa qatysqanymyzǵa qýanyshtymyz. Bul - Islam yntymaqtastyǵy uıymynyń ǵylym jáne tehnologııalar salasyndaǵy alǵashqy sammıti. Osy mańyzdy sammıtke qatysýǵa múmkindik jasaǵanyńyz úshin rızashylyq bildiremiz», - dedi Bandar ben Muhammad Hadjar.
Sondaı-aq, Islam damý bankiniń prezıdenti bul sammıt Nursultan Nazarbaevtyń ǵylym men jańa tehnologııalardy damytýǵa baǵyttalǵan qyzmetiniń aıqyn kórinisi ekenin atap ótti.
«Bul Sizdiń bolashaq urpaqtyń damyǵan eldermen básekelesýge múmkindigin arttyrýǵa qosqan úlesińiz. Islam yntymaqtastyǵy uıymyna múshe elderdiń ǵylym jáne tehnologııalar jónindegi qoryn qurýǵa qoldaý kórsetkenińiz úshin zor alǵysymdy bildiremin», - dedi Bandar ben Muhammad Hadjar.
