Nursultan Nazarbaev Iran prezıdenti Hasan Rýhanımen kezdesti
"Sizderdiń saıasat pen joǵary deńgeıdegi eki jaqty tıimdi kezdesýlerimizdiń arqasynda eki el arasyndaǵy saýda-sattyq pen júk tasymalynyń kólemi artyp keledi. Ásirese, aýyl sharýashylyǵy ónimderin jetkizý isi jandandy", - dedi Qazaqstan Prezıdenti.
Nursultan Nazarbaev Qazaqstan men Iran Kaspıı teńizi aımaǵyndaǵy jaqyn kórshi ekenin, sondaı-aq 2016 jylǵy ózara saparlar eki jaqty baılanysqa tyń serpin bergenin aıtty.
"Bizdiń senim men ózara túsinistikke negizdelgen búgingi tarıhı kezdesýimiz Kaspııge qatysty barlyq máseleni sheship, Kaspıı mańy elderi arasyndaǵy yntymaqtastyqty nyǵaıtady", - dedi Qazaqstan Prezıdenti.
Hasan Rýhanı Nursultan Nazarbaevqa Qazaqstanǵa kelýge múmkindik týǵyzǵany jáne Iran delegatsııasyna qonaqjaılyq kórsetkeni úshin rızashylyq bildirdi.
"Sizben kezdeskenimizge qýanyshtymyz. Búgingi sammıtte oń nátıjelerge qol jetkiziledi dep úmittenemin. Elderimiz geografııalyq jaǵynan ǵana emes, sondaı-aq basqa da aspektiler boıynsha jaqyn. Sondyqtan bizdiń múddelerimiz de ortaq", - dedi Hasan Rýhanı.
H.Rýhanı halyqaralyq jıyndarda Qazaqstannyń únemi Irandy qoldaıtynyn jáne ıadrolyq qarý taqyryby jónindegi halyqaralyq ýaǵdalastyqty turaqty túrde saqtaıtynyn atap ótti.
"Sizdiń elińiz jahandyq arenada, sonyń ishinde Astana protsesi aıasynda óte mańyzdy bitimgershilik mıssııasyn atqarady. Bizdiń qarym-qatynasymyzdyń strategııalyq sıpaty bar jáne ol barlyq baǵyt boıynsha damyp keledi. Búgin Aqtaýda Kaspıı máselesi jóninde mańyzdy sammıt ótedi. Bul Qazaqstannyń joǵary bedelin taǵy da naqtylaı túsedi", - dedi Iran prezıdenti.
