Nursultan Nazarbaev Iordanııamen tıimdi yntymaqtastyqty damytýǵa bolatyn salalardy atady

ASTANA. QazAqparat - Qazaqstan men Iordanııanyń áskerı-tehnıkalyq yntymaqtastyǵyn nyǵaıtýǵa alǵyshart bar. Bul týraly búgin  Aqordada elimizge resmı saparmen kelgen Iordanııa Hashımıt Koroldiginiń Koroli Abdalla ІІ ben ál-Hýseınmen ótken kelissózderden keıingi birlesken baspasóz málimdemesi barysynda Elbasy Nursultan Nazarbaev aıtty, dep habarlaıdy QazAqparat.

«Al ekijaqty baılanystarǵa keler bolsaq, kún tártibinde elderimiz arasyndaǵy saýda-ekonomıkalyq, ınvestıtsııalyq ózara is-qımylǵa erekshe mán  beremiz. Ekijaqty eksport-ımportqa  tasymaldaý baǵasy kedergi keltirip otyr. Soǵan oraı tıimdi logıstıkalyq arnalardy jetildirýdiń mańyzy óte zor. Kólik jolynyń qıyndyǵyna baılanysty saýda-sattyǵymyz búgingi kúni tómen deńgeıde tur. Sondyqtan biz kelissózder barysynda muny taǵy da atap óttik. Birinshiden, búginde Qazaqstan-Túrkimenstan-Iran arqyly Parsy shyǵanaǵyna jol shyqty. Ekinshiden, jańa ǵana bizdiń Úkimet basshymyz qol qoıyp kelgen Túrkııadan Grýzııa arqyly Ázerbaıjanǵa, odan  Kaspıı teńizi arqyly Qazaqstanǵa shyǵatyn jol ashyldy. Bul da Iordanııaǵa barar joldy jaqyndatýǵa múmkindik beredi», - dedi Qazaqstan Prezıdenti.

Sonymen qatar Elbasy eki eldiń ekonomıkasynyń birqatar basym baǵyttary bar ekendigine aıryqsha toqtaldy.

«Birinshiden - aýyl sharýashylyǵy. Bul salada ózara tıimdi yntymaqtastyqty damytýdyń múmkinshiligi zor ekendigin aıtyp óttik. Mysaly Qazaqstan Iordanııa aýyl sharýashylyǵy, mal sharýashylyǵy ónimderin jetkizetin bolsa, Iordanııadan qys jáne kóktem aılarynda, bizde joq kezde kókónis pen jemis  eksporttaı alady. Ekinshiden - farmatsevtıka salasy. Iordanııanyń álemge áıgili Hıkma kompanııasy Almaty qalasynda farmatsevtıkalyq zaýyt salyp jatyr. Biz ony qoldaımyz. Keıinirek durys bolatyn bolsa, bizde ony odan ary órkendetýge barlyq jaǵdaı bar. Úshinshiden - energetıka salasy. Iordanııanyń Qazaqstan sııaqty balamaly  energııa kózderin damytýǵa múddeli ekenin eskerip,  seriktestik ornatý múmkindigin qarastyrdyq. Tórtinshiden - áskerı-tehnıkalyq sala. Bul salada yntymaqtastyqty nyǵaıtýdyń alǵysharttary bar. Osy baǵyttardaǵy jumystardy odan ary jetildirý úshin úkimetaralyq komıssııaǵa tapsyrma berdik», - dedi Nursultan Nazarbaev.