Nursultan Nazarbaev Iordanııa Korolimen qandaı máseleler tóńireginde pikir almasty
Bul týraly búgin Aqordada elimizge resmı saparmen kelgen Iordanııa Hashımıt Koroldiginiń Koroli Abdalla ІІ ben ál-Hýseınmen ótken kelissózderden keıingi birlesken baspasóz málimdemesi barysynda Elbasy Nursultan Nazarbaev aıtty, dep habarlaıdy QazAqparat.
«Iordanııa halyqaralyq qoǵamdastyqta joǵary bedelge ıe bolyp, laıyqty qurmetke bólendi. Sol arqyly Taıaý Shyǵysta beıbitshilik pen qaýipsizdik ornatýda mańyzdy ról atqaryp kele jatqanyn bilemiz. Búgingi Sırııada bolyp jatqan jaǵdaı, lańkestik áreketter, bosqyndar barlyǵy da sol eldegi kelispeýshilikten, qaqtyǵystan týyndaýda. Osynyń áserinen búginde Iordanııa 1,3 mıllıonnan astam sırııalyq bosqyndy qabyldap, Palestına men Izraıl arasyndaǵy beıbit protseske aıryqsha úles qosqanyn atap ótýge bolady», - dedi Nursultan Nazarbaev.
Sonymen qatar Qazaqstan Prezıdenti Iordanııa tarabyna Astanada ótken EKSPO-2017 kórmesine jáne Islam yntymaqtastyq uıymynyń Ǵylym men tehnologııa jónindegi sammıtine qatysyp, úles qosqanyna rızashylyq bildirdi. «Búgin biz Korol Abdollamen Qazaqstan-Iordanııa yntymaqtastyǵynyń mańyzdy máselelerin talqyladyq. Soǵan oraı mazmundy ári jemisti kelissózder júrgizdik dep aıtýǵa bolady. Kún tártibindegi ózekti halyqaralyq máseleler, saıasat máseleleri jóninde pikir almastyq. Atap aıtqanda, Sırııadaǵy shıelenis, Iraktaǵy jaǵdaı, Katar tóńiregindegi daǵdarys jáne basqa problemalar týraly oı bólistik. Sırııa daǵdarysy qazirgi ýaqyttyń eń iri shıelenisiniń biri ekendigin bilesizder. Qazaqstan Sırııa daǵdarysyn sheshýge baǵyttalǵan barlyq bastamalardy qoldaıdy. Astanadaǵy kelissózder nátıjesinde Sırııadaǵy zorlyq-zombylyq aıtarlyqtaı azaıyp, jergilikti halyqtyń beıbit ómirge oralýyna múmkindik týdy. Osylaısha, Jenevadaǵy kelissózderge qosymsha alań bolyp sanalatyn Astana protsesi óziniń tıimdiligin kórsetip, halyqaralyq jaǵdaıda qoldaý taýyp otyr. Biz Iordanııanyń Astana protsesindegi rólin erekshe atap ótkimiz keledi», - dedi Elbasy.
