Nursultan Nazarbaev Ilham Álıevti Qazaqstanǵa shaqyrdy

«Prezıdentter ózara kezdesýde aımaqtyq jáne jalpy qaýipsizdik máselelerine toqtalatyny anyq. Osy oraıda, Qazaqstan BUU Qaýipsizdik Keńesiniń Turaqty emes múshesi retinde bizdiń aımaqtaǵy jáne Orta Azııadaǵy, sonyń ishinde Aýǵanstan men Sırııa jerindegi qaýipsizdik máselelerine nazar tigip otyr. Osyǵan baılanysty taǵy bir atap ótkim keledi, ázerbaıjan-armıan qaqtyǵysynda Qazaqstan BUU qabyldaǵan rezolıýtsııanyń ustanymyn qoldaıdy. Ol rezolıýtsııany kezinde qoldap, daýys bergen de bolatynbyz. ıAǵnı biz halyqaralyq qarym-qatynastardyń jalpy normalaryn ustanamyz», - dedi QR Prezıdenti baspasózge birlesken málimdeme jasaý barysynda.
Sonymen qatar Memleket basshysy, Qazaqstan Ázerbaıjanmen, Armenııamen jáne Grýzııamen birdeı jaqsy qarym-qatynasta ekendigin atap ótti.

«Biz munda beıbitshilik ornaǵanyn, másele tek beıbit jolmen sheshilgenin qalaımyz. Osy baǵytta biz qoldan keler barlyq kómegimizdi berip jatyrmyz, memleketterge osy máseleni beıbit jolmen sheshý joldaryn usynyp, beıbitshilikke yntalandyrýdamyz. Bul armıan jáne ázerbaıjan halyqtarynyń múddelerine, barlyqtarymyzdyń da múddelerimizge jaýap beredi. Bizge ózara saýdany damytyp, ary qaraı damýǵa jol ashý kerek», - dedi Nazarbaev.

«Bul saparym Ázerbaıjan-Qazaqstan qarym-qatynastaryna jańa baǵyt, jańa serpin beretinine senimdimiz. Bul eki elge de tıimdi, bizdiń memleketter arasyndaǵy dástúrli dostyǵymyzdy, ózara senimimizdi nyǵaıtady. Sebebi bizde bir tarıh, bir mádenıet, bir til, ortaq tamyrymyz bar jáne ol bizdi jaqyn etedi. Qazaqstan men Ázerbaıjan arasynda sheshilmegen máseleler joq. Jeke ózim bul saparyma kóńilim tolyp otyr. Ilham Geıdaruly, Sizderdiń qonaqjaılyqtaryńyzǵa óz atymnan rızashylyǵymdy qabyl alyńyz. Men Sizdi Qazaqstanǵa resmı saparmen kelýge shaqyramyn. EKSPO-2017 kórmesinde jáne Shanhaı Yntymaqtastyǵy Uıymynyń sammıtine resmı qonaq bolýǵa shaqyramyn. Tóraǵa memleket retinde Sizge qonaqtap qaıtýyńyzdy suraımyn», - dep túıdi sózin Memleket basshysy.