«Nursultan Nazarbaev halyqaralyq áýejaıy» memlekettiń ımıdjine oń áser etedi - Máýlen Áshimbaev
ASTANA. QazAqparat - «Nursultan Nazarbaev halyqaralyq áýejaıy» memlekettiń ımıdjine oń áser etetin strategııalyq nysan. Bul týraly Májilistiń jalpy otyrysynan keıin tilshilerge bergen suhbatynda depýtat Máýlen Áshimbaev málim etti, dep habarlaıdy QazAqparat.
«Ózderińiz bilesizder, búginde birqatar elderde iri nysyndar men halyqaralyq áýejaılar memleket jáne qoǵam qaıratkerleriniń atymen atalady. Mysaly, Atatúrik atyndaǵy Ystanbul áýejaıy Eýropadaǵy iri áýejaılardyń biri. Sonymen qatar Parıjde Sharl de Goll atyndaǵy, sondaı-aq Nıý-Iork qalasyndaǵy Kennedı esimi berilgen áýejaılar bar. Sondyqtan memleket basshylarynyń esimi berilgen áýejaılar az emes»,-dep toqtaldy depýtat.
M. Áshimbaev Qazaqstan saıası, ekonomıkalyq salalarda úlken jetistikterge jetip jatqanyn, osynyń barlyǵy Elbasy reformalarynyń nátıjesi ekenin jáne oǵan eshqandaı kúmán joq ekendigin aıtty.
«Jalpy, elimizde jańǵyrý úderisi ary qaraı jalǵasyp jatyr. Bul turǵyda Nursultan Nazarbaevqa dúnıejúzinde de, eldiń ishinde de úlken qurmet bar ekeni belgili. Atap aıtqanda, álem elderinde kóptegen konferentsııalar men kezdesýlerde bolamyz. Sol sharalarda sheteldik áriptesterimiz Qazaqstan Prezıdenti jaıynda jyly lebizderin bildirip jatady. Halyqaralyq áýejaı memlekettiń ımıdjin qalyptastyratyn úlken nysan. Sondyqtan mańyzdy strategııalyq nysandy Elbasynyń esimimen ataý - bul óte zańdy ári oryndy sheshim»,-dep túıindedi depýtat.
Budan buryn habarlanǵandaı , Astana áýejaıy «Nursultan Nazarbaev halyqaralyq áýejaıy» bolyp ataldy.
