Nursultan Nazarbaev Glencore International AG kompanııasynyń basshylyǵymen kezdesti
Elbasy Glencore International AG kompanııasynyń basshysy Aıvan Glazenbergke Qazaqstannyń taý-ken ónerkásibin damytýǵa qosqan úlesi úshin rızashylyǵyn bildirdi. Qazaqstannyń Tuńǵysh Prezıdenti negizgi ınvestory Glencore International AG bolyp tabylatyn «Qazmyrysh» jaýapkershiligi shekteýli seriktestiginiń tıimdi jumysyn atap ótti.
– Jıyrma jylǵa jýyq ýaqyt tabysty jumys istegennen keıin siz kompanııa basshysy laýazymynan ketip jatyrsyz. Bizdiń tıimdi yntymaqtastyǵymyz memleket bıýdjetine qomaqty kiris ákeldi. Osy ýaqyt ishinde kompanııanyń óndiristik kórsetkishteri aıtarlyqtaı ulǵaıdy, – dedi Nursultan Nazarbaev.
Sondaı-aq Elbasy «Qazmyrysh» kásiporny óńirdiń ekologııalyq jáne áleýmettik máselelerin sheshýge belsene atsalysyp júrgenine toqtaldy.
– Pandemııa saldarynan týyndaǵan qazirgi qıyn jaǵdaıda halyqqa qoldaý kórsetip, jumys oryndaryn saqtaýdy jáne áleýmettik máselelerdi sheshýdi jalǵastyra berýdi suraımyz. Jalpy osy baǵytta sizderdiń kompanııalaryńyz elimiz boıynsha kóshbasshylardyń biri bolyp sanalady, – dedi Qazaqstannyń Tuńǵysh Prezıdenti.
Óz kezeginde A.Glazenberg Nursultan Nazarbaevqa taý-ken salasy eńbekkerlerine kórsetken qoldaýy úshin, sondaı-aq táýelsizdik jyldarynda elde qolaıly ınvestıtsııalyq klımat qalyptastyrǵany úshin alǵysyn bildirdi.
– Qazaqstan – taý-ken salasyndaǵy ınvestorlar úshin eń senimdi ári qaýipsiz elderdiń biri. Glencore jumys isteıtin basqa elderden ereksheligi, Qazaqstanda ınvestorlarǵa qatysty zańnama men salyq rejımi turaqty, saıası rejım senimdi ári ornyqty. Chılıde, Perýde salyq ózgeredi, Afrıkada únemi bári qubylmaly, tipti Avstralııada da ózgeris bolyp turady. Qazaqstanda túsinikti, qarapaıym ári ózgermeıtin erejeler bar. Bul alańsyz jumys istep, ınvestıtsııany arttyrýǵa múmkindik beredi, – dedi A.Glazenberg.
