Nursultan Nazarbaev fın tarapyn Qazaqstannyń kólik áleýetimen tanystyrdy
«Men Qazaqstanda ınfraqurylym máseleleri boıynsha júrgizilip jatqan jumystar jaıynda aıttym. Qazaqstannyń jer kólemi ulanǵaıyr, álemde 9-oryn alady. Sońǵy 4 jylda 4,5 myń shaqyrym avtoban, 2,5 myń shaqyrym temir jol saldyq. Onyń ishinde «Batys Eýropa - Batys Qytaı» avtomobıl dálizi bar. Kaspıı, Parsy shyǵanaǵy arqyly Úndistanǵa shyǵý múmkindigi paıda boldy. Sondaı-aq Fınlıandııadan alǵash ret Reseı, Qazaqstan arqyly Qytaıǵa konteınerlik poıyzdy iske qostyq», - dedi Qazaqstan Prezıdenti.
Memleket basshysy halyqaralyq sarapshylardyń pikirinshe, Qazaqstan ótken jyly «EKSPO-2017» halyqaralyq mamandandyrylǵan kórmesin tabysty ótkizgendigin atap ótti. Halyqaralyq shara aıasynda ótken Fınlıandııanyń Ulttyq kúnine el Prezıdenti Saýlı Nıınısteniń arnaıy qatysqanyn eske saldy.
«Biz jańa energetıka taqyrybyna qatysty 100 úzdik jobany tańdap aldyq, onyń 14-i fın jobasy. Qazirgi ýaqytta «EKSPO» ornynda «Astana» halyqaralyq qarjy ortalyǵy quryldy. Biz fın bıznesin aǵylshyn tili, aǵylshyn quqyǵy qoldanylatyn atalǵan ortalyqtyń jumysyna qatysýǵa shaqyrdyq. Onda jumys isteıtinderge vızasyz rejim ońaılatylyp, salyqsyz jumys isteý qarastyrylǵan», - dedi Nursultan Nazarbaev.
Esterińizge sala ketsek, búgin Elbasy Fınlıandııa Prezıdenti Saýlı Nıınıstemen shaǵyn jáne keńeıtilgen quramda kezdesý ótkizdi.
Kezdesýden keıingi birlesken málimdeme barysynda Nursultan Nazarbaev Qazaqstan-Fınlıandııa bıznesmenderi 600 mln dollardyń kelisimshartyn jasasqanyn atap ótti.
Sapar aıasynda Memleket basshysy keshe fın bıznes kapıtandarymen júzdesti.
Kezdesý barysynda Memleket basshysy Fınlıandııadan Qazaqstan arqyly Qytaıǵa jańa temir jol baǵdary ashylatyndyǵyn aıtty jáne fın kompanııalaryn elimizdegi agroónerkásiptik keshendegi jobalardy júzege asyrýǵa shaqyrdy.
Fın kompanııalary úshin Qazaqstannyń týrızm salasy da tartymdy ekenin, ІT-kompanııalaryna da qolaıly jaǵdaı jasalatyndyǵyn atap ótti.
