Nursultan Nazarbaev eldi tabysty damytý qadamdaryn atady
«Kóshbasshy men halyq birtutas bolǵanda, memleket tabysqa jetedi. Al ázirlengen baǵdarlamalar men ıdeıalar halyqtyń tolyq qoldaýymen iske asyrylady. Bizde osylaı boldy, ıaǵnı júrgizilgen saıasat durys boldy dep sanaımyn», - dep toqtaldy Elbasy.
N. Nazarbaev jalpy halyqtyq bes saılaýǵa qatysqanyn jáne daýys berý nátıjesinde elektorattyń negizgi bóligi qoldaý jasap kelgenin atap ótti.
«Turaqtylyq pen ózara túsinistik arqasynda biz tabysqa jettik dep sanaımyn. Bul rette sarapshylar men kórshiles elder ózderiniń tıisti baǵasyn berip jatyr», - dedi QR Tuńǵysh Prezıdenti.
Elbasy óz mandatynyń aıasynda jumysyn jalǵastyrýǵa jáne óziniń kandıdatýrasyn usyný múmkindigi bolǵanyn, sondaı-aq burynǵysynsha halyqtyń keń qoldaýyna ıe bolatynyna senimdi ekenin jetkizdi.
Osy oraıda, N. Nazarbaev jańa qadam kerektigin jón sanaǵanyn sóz etti.
«Jańa komanda, jańa adamdar ózderiniń ınnovatsııalary men oılaryn iske asyrady dep sanaımyn. Bizdiń elde strategııalyq baǵdarlamalar ázirlengen. Qazaqstan resýrsqa, munaı men gazǵa, kóptegen paıdaly qazbalarǵa baı. Sondyqtan bizdiń el Keńes Odaǵy kezinde shıkizat jetkizýshi retinde paıdalanylyp keldi. Qaıta óńdeý baǵyty damymady. Meniń bastamammen QR Ulttyq qory qurylyp, onyń esebinen biz ekonomıkany ártaraptandyrdyq», - dedi Elbasy.
Sonymen qatar N. Nazarbaev Qazaqstandaǵy «Tuńǵysh Prezıdent» pen Memleket basshysy túsinikterine baılanysty pikir bildirdi. «Spıker úshin yńǵaısyzdaý bolyp tur, ıaǵnı birinshi «Tuńǵysh Prezıdent», sodan keıin «Prezıdent» dep tanystyrýǵa týra keledi. Osyndaı jaǵdaı baıqaldy. Meniń oıymsha, Qazaqstanda ekijaqtylyq bolmaıdy. Bir Prezıdent bar jáne ol basty bolady. Al biz barshamyz ony saılaǵannan keıin, qoldap jumys isteıtin bolamyz», - dedi N. Nazarbaev.
