Nursultan Nazarbaev dańǵylyndaǵy taqtalar aýysatyn boldy
ALMATY. QazAqparat - Nursultan Nazarbaev dańǵylyndaǵy taqtalar 16 jeltoqsanda ózgeredi, dep habarlaıdy QazAqparat tilshisi.
Qalalyq ákimdiktiń baspasóz qyzmetiniń habarlaýynsha, Murat Ádilhanov, Vıacheslav Banşıkov, Vladıslav Lı syndy máslıhat depýtattary bıznestiń áleýmettik jaýapkershiligi aıasynda birqatar kóshelerdiń taqtalaryn ózgertý týraly bastama kótergen bolatyn.
Osyǵan oraı, Almatyda Nursultan Nazarbaev dańǵyly jáne Saǵadat Nurmaǵambetov, Talǵat Bıgeldınov, Roza Baǵlanova atyndaǵy kóshelerdiń taqtalaryn ózgertý 16 jeltoqsanǵa josparlanyp otyr.
«Nusultan Nazarbaev dańǵyly - Almatydaǵy basty kóshelerdiń biri, sondyqtan, biz kóshe anshlagtaryn (taqtalaryn) jańartý jumystaryna atsalyssaq deımiz», - dedi máslıhat depýtaty, bıznesmen, metsenat Vıacheslav Banşıkov.
Sonymen, Táýelsizdik kúni Nursultan Nazarbaev dańǵylyndaǵy 160 úı men 33 zańdy uıymdardyń kóshe taqtalary aýystyrylady. Saǵadat Nurmaǵambetov atyndaǵy kóshedegi 115 turǵyn úı men 11 zańdy uıym taqtalary ózgeredi. Roza Baǵlanova atyndaǵy kóshedegi 136 turǵyn úıdiń taqtasy jańarady. Talǵat Bıgeldınov atyndaǵy kóshedegi 24 úıdiń taqtasy aýystyrylady.
Almaty qalasynyń Tilderdi damytý basqarmasy kóshe ataýlaryn ózgertý qalaı júzege asatynyn jetkizdi.
«Ataýlary ózgergen kóshe anshlagtary respýblıkalyq, oblystyq, aýdandyq máni bar qalalar, aýyldar men kentter jáne basqa da eldi mekender rásimdeýdiń biryńǵaı standarty boıynsha júzege asady», - dedi Almaty qalasynyń Tilderdi damytý basqarmasynyń ókilderi.
