Nursultan Nazarbaev: Tsýkýba ýnıversıtetiniń qurmetti doktory ataný - zor mártebe
«Japonııanyń jetekshi oqý oryndarynyń biri - Tsýkýba ýnıversıtetiniń qurmetti doktory atanǵanyma qýanyshtymyn. Sizderdiń ýnıversıtet álemdik deńgeıdegi bilim berý jáne zertteý ortalyǵy sanalady. Óziniń tereń tarıhymen de tanymal. Tsýkýbanyń Nobel syılyǵy ıegerlerin oqytyp shyǵarǵan japondyq joǵary oqý oryndary qataryna kirýiniń ózi zor qurmetke laıyq. Ýnıversıtettiń úsh túlegi 1965 jáne 1973 jyldary - fızıkadan, 2000 jyly - hımııadan Nobel syılyǵyn aldy», - dedi Elbasy.
Nursultan Nazarbaev Tsýkýba ýnıversıteti qazaqstandyqtar arasynda da zor suranysqa ıe ekenin, 105 adam dıplom alǵanyn aıtty. Onyń basym bóligi táýelsizdiktiń eleń-alańynda jarııalanǵan «Bolashaq» baǵdarlamasy arqyly bilim alǵanyn eske saldy.
«2016 jyly Japonııaǵa sapar barysynda Tokaı ýnıversıtetiniń qurmetti doktory atanǵan edim. Japonııanyń laıyqty ári baı dástúri bar ǵylymı-zertteý ortalyqtarynyń qadir tutýy - men úshin úlken mártebe jáne bul Qazaqstannyń barsha halqyna degen qurmettiń belgisi. Óz tarapymnan elimizdiń jastar saıasatyna jáne bilimdi damytýǵa barlyq ýaqytta aıryqsha mán berdim. Meniń bastamammen myńdaǵan jas qazaqstandyq «Bolashaq» baǵdarlamasy arqyly memleket esebinen álemniń úzdik ýnıversıtetterinde bilim aldy», - dedi Elbasy.
Buǵan deıin habarlaǵanymyzdaı, Tsýkýba ýnıversıtetiniń prezıdenti Kesýke Nagata Elbasy Nursultan Nazarbaevqa atalǵan ýnıversıtettiń qurmetti doktory kýáligin tabys etken bolatyn.
