Nursultan Nazarbaev buǵan deıingi Joldaýdyń oryndalmaı qalǵan mindetin atady

ASTANA. QazAqparat - Memleket basshysy Nursultan Nazarbaev Qazaqstan halqyna arnalǵan bıylǵy Joldaýynda Astanada zamanaýı onkologııalyq ortalyqty salý máselesin qaıta kóterdi, dep habarlaıdy QazAqparat tilshisi.

«Kelesi jyldan bastap Astanada ulttyq onkologııalyq ortalyqtyń qurylysyna kirisý kerek. Men eki jyl boıy osyny qaıta-qaıta aıttym. Ústeldiń ústinen bir qoıyp, tapsyrma bermesem, bireýdiń de qımyldaıtyn túri joq. Bıyl fýndamentti quıyp tastańdar. Onyń ishinde eń zamanaýı tehnologııalar bolsyn», - dedi Elbasy.

Prezıdenttiń aıtýynsha, jańa onkologııalyq ortalyqta tomoterapııa, protonoterapııa, kıber-pyshaq, adam ımmýnıtetin kúsheıtý tehnologııasy bolýy qajet. «Qazir bizde júrektiń barlyq operatsııalary jasalady. Endi, osy salaǵa da jańa tehnologııalardy engizip, joǵary jetistikterge jetýimiz kerek. Sonyń arqasynda myńdaǵan adamnyń ómirin saqtap qalamyz», - dep atap kórsetti Memleket basshysy. 

Aıta keteıik, Prezıdent ulttyq onkologııalyq ortalyqty salýdy buǵan deıin de tapsyrǵan bolatyn.

N.Nazarbaev bıylǵy Joldaýynda aldaǵy bes jylda bilimge, ǵylymǵa jáne densaýlyq saqtaý salalaryna shyǵystardy qarjylandyrýdyń barlyq kózderinen Jalpy ishki óniminiń 10 paıyzyna deıin jetkizýdi tapsyrdy.