Nursultan Nazarbaev Brazılııa Prezıdentine kóńil aıtty
ASTANA. QazAqparat - Nursultan Nazarbaev Brazılııa Federatıvtik Respýblıkasynyń Prezıdenti Jaır Messıas Bolsonarýǵa kóńil aıtý jedelhatyn joldady, dep habarlaıdy QazAqparat Aqordanyń baspasóz qyzmetine silteme jasap.
Memleket basshysy Nursultan Nazarbaev Mınas-Jeraıs shtatyndaǵy bógettiń buzylýy saldarynan kóptegen adamnyń qaza bolǵany týraly habardy zor kúızelispen qabyldady.
«Osyndaı qıyn sátte Qazaqstan halqynyń jáne jeke ózimniń atymnan Sizge, qaza tapqandardyń týǵan-týysqandary men jaqyndaryna, sondaı-aq barsha Brazılııa halqyna kóńil aıtamyn.
Qaıǵylaryńyzǵa ortaqtasa otyryp, zardap shekkenderdiń tezirek saýyǵyp, otbasylaryna oralýyna tilektestigimdi bildiremin», - delingen jedelhatta.
Eske sala ketsek, Brazılııada sý bógeti jarylyp, 150 adam iz-túzsiz joǵalyp ketken bolatyn.
