Nursultan Nazarbaev: Bizde jumyssyzdyq máselesi joq, mamandar tapshylyǵy bar

ASTANA. QazAqparat - Memleket basshysy Nursultan Nazarbaev óńirlerdegi 20 JOO-ny Nazarbaev Ýnıversıtetiniń deńgeıine jaqyndatýdy jáne 200 kolledjdiń jumysyn kúsheıtýdi tapsyrdy, dep habarlaıdy QazAqparat tilshisi.

«Prezıdent Apparatynyń saýalnamasy boıynsha jumys berýshilerdiń 70 paıyzy kásiptik jáne tehnıkalyq bilim alyp, jumysqa ornalasqandarǵa kóńili tolmaıtyn bolyp shyqty. Ómir tez ózgerip keledi. Jańa tehnologııalar mamandyqtardyń jańa daǵdysyn talap etedi. Mine, sondyqtan, jastarmen kezdeskende 20 negizgi JOO-ny jańǵyrtý tapsyrmasyn júktedim. Árbir oblystaǵy negizgi JOO-lardy Nazarbaev Ýnıversıtetiniń deńgeıine jaqyndatý kerek. Álbette, 100 paıyz jaqyndatý múmkin bolmas. Dese de, bilim sapasy boıynsha jaqyndatýǵa tıispiz», - dedi Nursultan Nazarbaev.

Memleket basshysy sonymen birge árbir óńirdegi 10 kolledjde zaman talabyna saı jańa mamandyqtardy oqytý kerektigin atap ótti.

«Ár oblysta qandaı mamandyqtardyń kerektigi belgili ǵoı. Bizde jumyssyzdyq degen másele joq. Bizde mamandyq degen másele bar. Jan-jaqtan, oblystardan Astanaǵa keledi. Barlyq jerde qurylystar júrip jatyr. Jumysshylar jetispeıdi. Dánekerleýshi, qurylysshy joq. Bul jerde aspaz, bala tárbıeleýshi, daıashylar tapshy. Másele sonda. Jumyssyzdyqta emes», - dedi Elbasy.

Osy sebepti Prezıdent ár aımaqtan 10 kolledjden iriktep, joǵary deńgeıge shyǵarýdy júktedi.

«20 JOO men 200-ge tarta jańa kolledjdi aıqyndaý tapsyrmasyn Saǵadıev pen Ábilqasymovaǵa tapsyramyn», - dedi Nursultan Nazarbaev.

Eske sala ketsek, Astanada QR Prezıdenti Nursultan Nazarbaevtyń tóraǵalyǵymen Úkimettiń keńeıtilgen quramdaǵy otyrysy ótti.