Nursultan Nazarbaev beınelengen kýpıýra aınalymda qala ma – Ulttyq bank jaýaby
ASTANA. QazAqparat – Ulttyq bank Qazaqstan Táýelsizdiginiń 30 jyldyǵyna oraı Tuńǵysh Prezıdent Nursultan Nazarbaevtyń beınesimen shyǵarylǵan 20 myńdyq kýpıýranyń aınalymda qalýy týraly málimdedi, dep habarlaıdy QazAqparat tilshisi.
«Qazaqstan Respýblıkasy Táýelsizdiginiń 30 jyldyǵyna arnalǵan 20 000 teńge nomınalyndaǵy mereıtoılyq banknot zańdy tólem quraly bolyp sanalady. Bul banknottar tólemderdiń, bank operatsııalarynyń jáne aýdarymdardyń barlyq túrleri boıynsha basqa estelik banknottar sııaqty qabyldanýǵa mindetti. Banknottar tabıǵı tozýyna qaraı aqsha aınalymynan alynady. Mereıtoılyq jáne estelik banknottar boıynsha aınalym merzimi belgilenbeıdi», - dep habarlady Ulttyq Bank QazAqparat tilshisiniń saýalyna.
Aıta keteıik, 1 qazanda Qazaqstan Ulttyq banki jańa dızaındaǵy 20 000 teńgelik banknotty aınalymǵa shyǵardy. Banknottyń 25 qorǵanys elementi bar, mólsheri – 155h79 mm jáne sur túske basymdyq berilgen.
Bet jaǵynda Qazaqstan Respýblıkasynyń Memlekettik rámizderi, «Qazaq Eli» monýmenti, «Máńgilik El» saltanat qaqpasy, «Basqur» qazaq ulttyq oıý-órneginiń fragmenti jáne Táýelsizdik jyldaryn bildiretin «30» sany beınelengen.
