«Nursultan Nazarbaev: beıbitshilik jáne qoǵamdyq kelisim ıdeıasy» atty kitap oqyrmanǵa jol tartty

Shara barysynda sóz alǵan QHA Tóraǵasynyń orynbasary - Hatshylyq meńgerýshisi Eraly Toǵjanov kitaptyń tanystyrylymyna jınalǵandardy aldymen Astana kúni merekesimen quttyqtaı kele, «qysqa ǵana ýaqyt ishinde Astana búkil elge, dúnıejúzine tanymal, aldyńǵy qatarly elderdiń qaı-qaısysynan da kem túspeıtin astanaǵa aınaldy. Búgingi kúni Astana mádenı ǵana emes, sonymen qatar saıası da úlken ortalyq», dep atap ótti.

Osydan keıin ol jıynǵa qatysýshylarǵa avtorlyq ujymdy tanystyra kelip, oqyrman qolyna tıip otyrǵan monografııalyq eńbekke toqtaldy.

«Nursultan Nazarbaev: Beıbitshilik jáne qoǵamdyq kelisim ıdeıasy» kitabynda sońǵy kezeńderge deıingi 15 jyl ishindegi Prezıdenttiń QHA-nyń ár sessııasynda sóılegen sózderine ǵylymı turǵydan tereń taldaýlar jasalyp, qarastyryldy. Bul jaı ǵana Prezıdenttiń sózi ǵana emes, ol sol kezdegi memleketimizdiń basyndaǵy máseleler, túrli qıyndyq máseleleri, áleýmettik máseler, alda turǵan naqty-naqty problemalar bolatyn», dedi E.Toǵjanov.

Onyń atap ótýinshe, monografııalyq eńbekte sheteldik qoǵam qaıratkerleri men ǵalymdardyń Qazaqstandaǵy ulttyq saıasattyń damý úderisine, etnosaralyq toleranttylyq pen qoǵamdyq kelisim úlgisine qatysty aıtqan oı-tolǵamdary men túsiniktemeleri de qosa berilgen. Túsiniktemede qazaqstandyq úlgini qalyptastyrýdaǵy basty qozǵaýshy kúsh retinde Memleket basshysy Nursultan Nazarbaevtyń róli erekshe atalǵan.

Tusaýkeserge Qazaqstan halqy Assambleıasy Tóraǵasynyń orynbasary - Hatshylyq meńgerýshisi E.Toǵjanov, kitaptyń avtorlyq ujymy, QR Parlamentiniń depýtattary, QHA janyndaǵy Ǵylymı-saraptamalyq keńestiń músheleri, memlekettik organ, joǵary oqý oryndary, etnomádenı birlestik jáne BAQ ókilderi qatysty.

Kitap qazaq, orys jáne aǵylshyn tilderinde 2100 dana taralymmen jaryqqa shyqty.