Nursultan Nazarbaev barsha túlekterge óz aqylyn aıtty
Óz sózinde Prezıdent ózimen qatarlas adamdardyń atalary birinshi Dúnıejúzilik soǵysqa, al ákeleri ekinshi Dúnıejúzilik soǵysqa qatysqanyn jetkizip, ashtyq jáne taǵy basqa qıyndyqtarǵa tap bolǵanyn erekshe atap ótti. Sol soǵystarda mıllıondaǵan qazaq qyrylyp, maıdannan qaıtpaı qaldy. "Meniń býynym ǵana 70 jyldan beri beıbitshilik jaǵdaıda ómir súrip jatyr. Ol - bizdiń ákelerimizdiń istegen zor eńbegi. Biz - baqytty býynbyz. Sebebi bizdiń ómirimiz Táýelsizdikti qurýmen qatar keldi. Qazaqstannyń táýelsiz Týyn kóterýge, Astanamyzdy salýǵa múmkindik týdy. Ata-babalarymyzdyń armany oryndaldy. Sender arqyly áskerı joǵary oqý oryndardy bitirip jatqan kýrsanttarǵa jáne barlyq oqý oryndarynyń túlekterine tileıtinim - aq jol! Biz memleketti qurdyq, búkil dúnıejúzine pash ettik. Sender sol Táýelsizdikti kózdiń qarashyǵyndaı saqtap, kók Týymyzdy álemniń túkpir-túkpirinde jelbiretetin bolyńyzdar!", - dedi Nursultan Nazarbaev.
Aıta keteıik, búgingi shara barysynda QR Joǵarǵy Bas qolbasshysy Nursultan Nazarbaevtyń qolynan 12 túlek leıtenant pogonyn aldy. Olardyń ishinde QR Qorǵanys mınıstrligi Qurlyq áskerleri ınstıtýtynyń túlekteri Almas Kenjebekov pen Zaman Kerimqulov, radıoelektronıka jáne baılanys áskerı-ınjenerlik ınstıtýtynyń túlekteri Qaıyrjan Jumandyqov pen Temirlan Muqataev, QR Ulttyq qaýipsizdik komıteti shekara qyzmeti akademııasynyń túlekteri Madııar Dobekov pen Anatolıı Palenyx, QR Іshki ister mınıstrligi Qaraǵandy akademııasynyń túlegi Alısher Muxambetov, Qostanaı akademııasynyń túlegi Aınur Besagımova, Kókshetaý texnıkalyq ınstıtýtynyń túlekteri Roman Stepanov pen Ermek Qapparov, QR Ulttyq ulan áskerı ınstıtýtynyń túlekteri Baqdáýlet Tólebek pen Ýálıxan Jáýkenovter bar.
Aıta keteıik, merekelik sharanyń basynda Prezıdent Týdy qalaı tańdaǵanyn eske aldy . Sondaı-aq, Astana kúnine arnalǵan merekelik sharalardyń bastalǵanyn resmı túrde jarııalady.