Nursultan Nazarbaev áýejaıynyń 5 mln-shy jolaýshysy anyqtaldy
NUR-SULTAN. QazAqparat – Pavlodar qalasynyń turǵyny elorda áýejaıynyń 5 mıllıonynshy jolaýshysy qurmetine ıe boldy, dep habarlaıdy QazAqparat tilshisi.
«Búgin kútpegen jaǵdaı boldy, árıne qýanyshymda shek joq. Men jalǵyz emes, 2 nemeremmen keldim. Buryn mundaı utystardyń jeńimpazy atanyp kórmegenmin. Bul alǵash ret, endi sáttilikke senetin bolamyn. Barshańyzǵa alǵys aıta otyryp, kele jatqan jańa jyl merekelerińizben quttyqtaımyn», - dedi áýejaıdyń 5 mıllıonynshy jolaýshysy atanǵan, pavlodarlyq Zeınep Nurǵazına.
«Fly Arystan» áýekompanııasy ushaǵy qyzmetin paıdalanǵan atalǵan jolaýshy elordaǵa qonaqqa kelgen.
«Búgin bizdiń áýejaıda mereke. Áýejaıymyzdyń qurmetti 5 mıllıonynshy jolaýshysyn qarsy alýdamyz. Tańerteńnen bastap kim bolady eken dep kúttik. Árıne jeńimpaz jolaýshyǵa jolǵa shyqqanda eń kerek zat júk chemodanyn syıǵa tartatmyz», - dedi Nursultan Nazarbaev halyqaralyq áýejaıynyń basqarma tóraǵasy Rádilbek Ádımolda.
5 mıllıonynshy jolaýshyǵa berilgen syı-sııapat munymen bitpedi. Atap aıtqanda «Fly Arystan» áýekompanııasy jarty jyl ishinde kez kelgen baǵytqa ári-beri ushý bıletin syıǵa tartsa, Astana Convention Bureau LLP kompanııasy «The Ritz-Carlton Astana» qonaq úıinde turý sertıfıkatyn tabys etti.
Áýejaı bergen aqparatqa súıensek, ústimizdegi jyldyń 11 aıy boıynsha 4,7 mln jolaýshy áýe qozǵalysy qyzmetin paıdalandy. Jáne bul kórsetkish ótken jylmen salystyrǵanda 9,2 paıyzǵa joǵary.
