«Nursultan Nazarbaev» áýejaıyndaǵy tosyn oqıǵa: Ushaq qozǵaltqyshy saraptamaǵa jiberildi
ASTANA. QazAqparat - «Nursultan Nazarbaev» áýejaıynda tútindegen Airbus A320 ushaǵynyń qozǵaltqyshy aqaý shyǵý sebebin anyqtaý jáne odan ary jóndeý úshin saraptamaǵa jiberildi. Bul jaıynda «Eır Astana» áýe kompanııasynyń baspasóz qyzmetinen málim etti, dep habarlaıdy QazAqparat tilshisi.
«15 qyrkúıek kúni «Atyraý-Astana» baǵytyndaǵy KS 982 reısin oryndaǵan Airbus A320 ushaǵy Astana áýejaıyna saǵat 17:17-de shtattyq rejimde qondy. Atyraýdan ushyp shyǵar aldynda ushaq mindetti tehnıkalyq qyzmet kórsetýden ótken jáne reısti oryndaýǵa tolyqtaı daıyn bolǵan. Astanaǵa kelgennen keıin, áýe kemesi turaqqa toqtap, saǵat 17-26-da eki qozǵaltqyshyn da óshirgen soń áýe kompanııasynyń ınjenerlik qyzmeti sol jaq qozǵaltqyshtyń tútindegenin anyqtady. Injenerlik qyzmet pen órt sóndirýshiler saǵat 17:39-da órtti tolyqtaı sóndirdi», - delingen taratylǵan aqparatta.
Kompanııanyń atap ótýinshe, ushaq ekıpajy bolǵan jaıt jaıynda jolaýshylardy der ýaqytynda habarlandyryp, jaǵdaıdy tolyq baqylaýda ustaǵan. 91 jolaýshy men 8 ekıpaj múshesin ushaqtan túsirý shtattyq tártippen trap arqyly júzege asyryldy. Zardap shekkender joq.
«Bolǵan jaıtqa baılanysty tergeý amaldary júrgiziletin bolady. Qazirgi ýaqytta qozǵaltqysh aqaý shyǵý sebebin anyqtaý jáne odan ary jóndeý úshin saraptamaǵa jiberildi. Ushý qaýipsizdigi «Eır Astana» áýe kompanııasynyń basymdyǵy sanalady. Sondyqtan jaǵdaıdy anyqtaý úshin barlyq sharalar qabyldanady», - dep atap ótedi baspasóz qyzmetinen.
