Nursultan Nazarbaev áýejaıynda kapsýldy qonaq úı ashyldy
ASTANA. QazAqparat - Astanadaǵy Nursultan Nazarbaev halyqaralyq áýejaıynda fýtýrıstik stıldegi «Caps Lock» kapsýldy qonaq úıi ashyldy, dep habarlaıdy QazAqparat áýejaıdyń baspasóz qyzmetine silteme jasap.
Japon tehnologııasy boıynsha ázirlengen sońǵy úlgidegi kapsýldy qonaq úıde jýynyp, shaıynyp, uıyqtap tynyǵý úshin barlyq jaǵdaı jasalǵan.
Eń alǵash Japonııada paıda bolǵan kapsýldy qonaq úı týrıster arasynda keńinen tanymal. Qazaqstandaǵy áýejaılar ishinde kapsýldy qonaq úı alǵash ret Astanada iske qosyldy. Qonaqtardyń osy jerde erkin demalýy úshin smart-TV, jeke seıf, túrli tústi LED jaryqtary, «rozetkalar», USB júıesi, oqýǵa arnalǵan ústel, jeldetkish, aýa baptaǵysh, órtke qarsy júıe, oıatqysh jáne eń bastysy taza tósenishteri men jeke gıgıenalyq quraldary bar ortopedııalyq tósek qoıylǵan.
Qonaq úıde barlyǵy kelýshilerge beriletin magnıttik SMART karta arqyly basqarylady. Kelýshiler qoldaryna beriletin planshet arqyly ózderine qajet reısterdi Online rejımde bilip otyrady. Qonaqúı 10 adamǵa arnalǵan.
Búginde mundaı tynyǵý oryndary álemniń kóptegen qalalarynda, atap aıtqanda, Dýbaı, Atlanta (AQSh), Fıladelfııa (AQSh), Mıýnhen (Germanııa), London (Ulybrıtanııa), Amsterdam (Nıderlandy), Tokıo (Japonııa), Mehıko (Meksıka) áýejaılarynda bar.
