Astana áýejaıy halyqaralyq standarttardy saqtaı otyryp, tsıfrlyq jańalyq engizdi
ASTANA.KAZINFORM – Nursultan Nazarbaev atyndaǵy halyqaralyq áýejaıdyń 2025 jylǵy jetistikteri qandaı.
Astana áýejaıy jyldyń mańyzdy 5 oqıǵasyna toqtalyp ótti.
Ótken jyl Qazaqstannyń basty áýe qaqpasy – Nursultan Nazarbaev atyndaǵy halyqaralyq áýejaı úshin naqty nátıjelermen, júıeli ózgeristermen jáne jańa deńgeıge qadam basýmen este qaldy. Áýejaı ınfraqurylymdy jańartý, qaýipsizdikti kúsheıtý, qyzmet kórsetý sapasyn arttyrý jáne tsıfrlyq sheshimderdi engizý baǵytynda júıeli jumys istedi.
Senimdi ınfraqurylym – turaqty jumystyń negizi
Jyldyń mańyzdy oqıǵalarynyń biri – aerodrom ınfraqurylymyn keshendi jańartý jumystary. Jóndeý jumystary qysqa merzimde eki aı ishinde aıaqtaldy. Qolaıly aýa raıy jaǵdaılary ushý-qoný jolaǵynda barlyq tehnıkalyq talaptardy saqtaı otyryp, joǵary sapaly jóndeý júrgizýge múmkindik berdi.
Ushý-qoný jolaǵy men perrondaǵy asfaltbeton jabyny jańartylyp, aerodromdyq tańbalaý halyqaralyq standarttarǵa sáıkestendirildi. Eskirgen jaryq-sıgnaldyq júıeler zamanaýı jaryqdıodty jabdyqtarmen almastyryldy. Barlyq jumys operatsııalyq qyzmetke áser etpeı, belgilengen merzimde oryndaldy. 1 qarashadan bastap áýejaı shtattyq rejımde turaqty jumysyn jalǵastyryp jatyr.
Derekterge negizdelgen servıs
2025 jyly Astana áýejaıy jolaýshylarǵa qyzmet kórsetý sapasyn basqarýda jańa kezeńge ótti. Áýejaı Airports Council International ázirlegen Airport Service Quality (ASQ) halyqaralyq baǵdarlamasyna qosyldy. Baǵdarlama jolaýshylardan álemdik kórsetkishtermen salystyrýǵa bolatyn obektıvti keri baılanys alýǵa múmkindik beredi.
Baǵdarlama aıasynda sáýir aıynan bastap arnaıy daıyndyqtan ótken agentter tsıfrlyq quraldar arqyly jolaýshylar arasynda saýalnama júrgizedi. Saýalnama barysynda jınalatyn derekter naqty basqarýshylyq sheshimder qabyldaýǵa negiz bolyp, servısti kezeń-kezeńimen jaqsartýǵa múmkindik beredi.
Personal – basty qundylyq
Jyl ishinde áýejaı personalynyń jumysy halyqaralyq deńgeıde baǵalandy. 2025 jyly Nursultan Nazarbaev atyndaǵy halyqaralyq áýejaı alǵash ret Skytrax World Airport Awards syılyǵyn «Ortalyq Azııa men TMD áýejaılary arasyndaǵy úzdik personal» nomınatsııasy boıynsha ıelendi. Bul marapat álemniń 100-den astam elinde júrgizilgen táýelsiz jahandyq jolaýshylar saýalnamasynyń qorytyndysy boıynsha beriledi.
Bul marapat eki myńnan astam qyzmetkerdiń kásibıligi men kúndelikti jaýapty eńbeginiń nátıjesi. Marapattyń Jumysshy mamandyqtar jyly aıasynda alynýy óndiristik sala qyzmetkerleriniń úlesi aıryqsha mánge ıe ekenin taǵy bir dáleldedi.
Qaýipsizdik - basty basymdyq
Jolaýshylar men reısterdiń qaýipsizdigi Astana áýejaıy úshin sózsiz basymdyq bolyp qala beredi. Bıyl avıatsııalyq qaýipsizdik boıynsha ICAO aýdıtiniń nátıjesinde Qazaqstan halyqaralyq talaptarǵa sáıkestik deńgeıi 95,7 paıyzdy kórsetip, álemdik reıtıngte 20-orynǵa ıe boldy.
Halyqaralyq sarapshylar aldyńǵy aýdıttermen salystyrǵanda ilgerileýdi atap ótti: zańnamanyń jetildirilýi, qadaǵalaý júıesiniń kúsheıýi jáne mamandar daıarlyǵy deńgeıiniń artýy. Astana áýejaıy úshin bul nátıjeler barlyq qyzmettiń kúndelikti júıeli jumysynyń jáne úzdik halyqaralyq standarttarǵa sáıkestiktiń dáleli.
Tájirıbede dáleldengen halyqaralyq standarttar
Jyldyń mańyzdy qorytyndylarynyń biri – jerústi qyzmet kórsetý qaýipsizdigi boıynsha IATA ISAGO baǵdarlamasynyń aýdıtinen taǵy bir márte sátti ótý. Nursultan Nazarbaev atyndaǵy halyqaralyq áýejaı Ortalyq Azııada ISAGO boıynsha sertıfıkattalǵan jalǵyz áýejaı mártebesin saqtap qaldy. 1300-den astam halyqaralyq standart táýelsiz aýdıtorlar tarapynan qaıta rastalyp, avıakompanııalar men seriktesterdiń senimin nyǵaıtty.
Tsıfrlyq servıster
Taǵy bir eleýli qadam – avtomattandyrylǵan shekaralyq baqylaý júıesiniń engizilýi. Jańa geıtter Qazaqstan azamattaryna qujattar men derekterdi avtomatty tekserý arqyly shekaralyq rásimderden nebári 15–20 sekýndta ótýge múmkindik beredi. Bul sheshim qazirdiń ózinde kezekterdi qysqartyp, ótkizý qabiletin arttyryp, áýejaıdaǵy jolaýshylar aǵynyn uıymdastyrýdy jaqsartyp otyr.
Ótken jyl Astana áýejaıy úshin pozıtsııalardy sapaly túrde nyǵaıtqan kezeń boldy. Jańartylǵan ınfraqurylym, qaýipsizdik, kásibı komanda jáne tsıfrlyq sheshimder áýejaıdyń óńirlik avıatsııalyq hab retindegi rólin kúsheıtedi.
Aıta ketelik Astana áýejaıy 12 mln jolaýshyǵa qyzmet kórsetedi.