Nursultan Nazarbaev: «Arhıv-2025» jeti jyldyq baǵdarlamasyn jasaý kerek
Prezıdent maqalada kóterilgen máseleler jan-jaqty oı eleginen ótkizip tereń zerdeleýdi talap etetinine nazar aýdarady. Bul rette Elbasy mundaı jumysty birneshe iri joba arqyly bastaýǵa bolatynyn jazady.
«Táýelsizdik jyldarynda halqymyzdyń ótkenin zertteýge qatysty aýqymdy jumystar atqaryldy. Elimizdiń tarıhı jylnamasyndaǵy aqtańdaqtardy qaıta qalpyna keltirýge jol ashqan «Mádenı mura» baǵdarlamasy tabysty iske asyryldy. Biraq, babalarymyzdyń ómiri men olardyń ǵajap órkenıeti jónindegi kóptegen derekti qujattar, áli de bolsa, ǵylymı aınalymǵa túsken joq. Olar álemniń búkil arhıvterinde óz izdeýshisi men zertteýshisin kútip jatyr. Sondyqtan, ejelgi dáýirden qazirgi zamanǵa deıingi kezeńdi qamtıtyn barlyq otandyq jáne sheteldik muraǵattar dúnıesinde eleýli irgeli zertteýler júrgizý úshin «Arhıv-2025» jeti jyldyq baǵdarlamasyn jasaý qajet dep sanaımyn»,- dep jazady Elbasy.
Bul rette N.Nazarbaev jobany júzege asyrý barysynda tarıhshylardan, derektanýshylar men mádenıettanýshylardan qurylǵan arnaıy toptardyń otandyq jáne sheteldik iri arhıvtermen ózara júıeli ári uzaq merzimdi yqpaldastyqta bolyp, izdeý-zertteý jumystaryna basa mán berý kerektigin alǵa tartady.
«Qaı jaǵynan bolsyn, bul mańyzdy jumys memleket esebinen atqarylatyn «akademııalyq týrızmge» aınalmaýǵa tıis. Arhıv derekterin tek jınaqtap qana qoımaı, barlyq múddeli zertteýshiler men qalyń jurtshylyqqa qoljetimdi bolýy úshin olardy belsendi túrde tsıfrlyq formatqa kóshirý kerek. Óz tarıhyna degen maqtanysh sezimin uıalatyp, otanshyldyq tárbıe berý mektep qabyrǵasynan bastalýy tıis. Sondyqtan, mektepter men barlyq óńirdegi ólketaný mýzeıleriniń janynan tarıhı-arheologııalyq qozǵalystar qurý mańyzdy. Ult tarıhyn sanaǵa sińirý barsha qazaqstandyqtardyń boıyna óz bastaýlaryna degen ortaqtyq sezimin qalyptastyrady», - deıdi Nursultan Nazarbaev.
Aıta keteıik, búgin Elbasy N.Nazarbaevtyń «Uly dalanyń jeti qyry» atty maqalasy jarııalanǵan bolatyn. Sondaı-aq Prezıdent «Uly dalanyń uly esimderi» atty entsıklopedııalyq saıabaq ashýdy usyndy.
