«Nursultan Nazarbaev álemniń bes jetekshi saıasatkerleriniń qataryna kiredi» - respýblıkalyq basylymdarǵa sholý

***

Qazaqstan Prezıdenti Nursultan Nazarbaevtyń Ońtústik Koreıaǵa resmı sapary bastaldy. Osyǵan oraı «Aıqyn» gazetiniń búgingi nómirinde álemge tanymal saıasater Margaret Tetcherdiń «Nursultan Nazarbaev álemniń bes jetekshi saıasatkerleriniń qataryna kiredi» degen sózin taqyrypqa alǵan kólemdi maqala jarııalandy. Basylymnyń jazýynsha, aldymen Qazaqstannyń Ońtústik Koreıadaǵy jylyn saltanatty ashý rásimi ótken. Sharaǵa sol eldiń basshysy Lı Men Bak pen Elbasy Nursultan Nazarbaev qatysqan. Maqalada N.Nazarbaevtyń «Búginde táýelsiz Qazaqstanda koreı halqynyń ókilderi ózge ulttarmen bir otbasy retinde tatý-tátti turyp jatyr. Olardyń el bıznesinde, bilim berý, medıtsına jáne mádenıet salasyndaǵy úlesi úlken. Koreı ultynyń ókilderi Qazaqstan halqy Assambleıasynyń jumysyna belsendi atsalysyp keledi. Parlamentte de koreı dıasporasynyń ókili otyr», degen sózi keltirilgen.

Elbasynyń resmı sapary egjeı-tegjeıli jazylǵan kelesi maqala «Kazahstanskaıa pravda» gazetinde de jarııalandy. Basylymnyń jazýynsha, ashylý saltanatynda sóz sóılegen N.Nazarbaev bul oqıǵa tarıhy tamyrlas eki el arasyndaǵy áriptestik pen yntymaqtastyqtyń jańa satyǵa kóterilgenin bildiretindigin basa aıtqan.

«Keshe el Parlamentinde Baılanys jáne aqparat mınıstri retinde Asqar Jumaǵalıevtiń debıýti ótti. Jáne jaman ótpedi deýge keledi: Másimov komandasynda eń jas mınıstr bolyp tabylatyn 37 jastaǵy Asqar Qýanyshuly Reseıdiń Orynbor oblysynyń týmasy bolǵandyǵyna qaramastan, tuńǵysh baıandamasyn tolyqtaı derlik qazaq tilinde jasady», dep jazady «Aıqyn» gazeti. Maqala basylymnyń búgingi sanynda «Elektrondy qyzmet tutynýshynyń múddesine qaraı qurylady» degen taqyryppen berilgen.

«Aıqyn» gazetiniń jazýynsha, Astananyń jańa ýnıversıtetine stýdentterdi irikteý ótip jatyr. Bul oraıda Elbasy N.Nazarbaev atalǵan bilim ordasynda tegin bilim alý úshin 500 stýdentke arnaıy bilim grantyn bólý týraly sheshim qabyldaǵan. Bul týraly keshe elordada baspasóz máslıhatyn ótkizgen atalǵan JOO-nyń vıtse-prezıdenti Q.Daıyrova málim etti. Emtıhan tapsyrýǵa talapkerlerdi tirkeýdiń ekinshi kezeńi mamyrdyń 10-yna josparlanǵan.

***

«Uly Jeńis merekesine oraı elordalyq ardagerler jergilikti bıýdjetten 35 myń teńgeden birjolǵy ótemaqy alatyn boldy. Keshe qalalyq máslıhat depýtattary osyndaı sheshim qabyldady», dep jazady «Astana aqshamy» gazeti. Sondaı-aq Jeńis merekesiniń 65 jyldyq qurmetine oraı, astanalyq ardagerler Reseı, Belarýs, Ýkraına jáne Eýroodaq aýmaǵyndaǵy qazaqstandyq jaýyngerler soǵysqan qalalar men jerlengen oryndarǵa estelik estafetasymen baratyn bolady.

«Astana aqshamy» gazetiniń dástúrli «Áleýmet saýaly - ákim jaýaby» aıdarynda qala basshysy Imanǵalı Tasmaǵambetov elorda turǵyndarynyń basylym betinde qoıǵan saýaldaryna tuşymdy jaýap bergen.

***

«Alash aınasy» gazetiniń beısenbilik nómirinde «Oqýshyny da, oqytýshyny da adastyrǵan oqýlyq» degen taqyryppen kólemdi maqala jarııalandy. «Mektep oqýlyqtaryna qatysty másele búginde kópshilik qaýymdy ǵana emes, bilikti mamandardyń da úlken alańdaýshylyǵyn týǵyzýda. Sońǵy bes jyl kóleminde udaıy jalǵasyp kele jatqan osy narazylyqtyń kiltin biz ádette jekelegen kitaptardan bolmasa oqýlyq avtorlarynan izdep keldik. «Mamandar jetispegendikten de oqýlyqtardy pedagogıkalyq tájirıbeden tysqary, oqýshy psıhologııasy men mektep oqýlyǵy teorııasynan habarsyz adamdar jazyp jatyr. Bar kinárat sodan» dep túsindik» dep jazǵan basylym rasynda, osy jaǵdaıǵa qalaı tap boldyq? Orta mektepti sapaly oqýlyqpen qamtamasyz etýge qabiletti ǵylymı-óndiristik keshen jumysyn qalaı qojyratyp aldyq? Eń bastysy, tap qazirgi ýaqytta qasıetti «bilim bulaǵynyń» laılanýyna sebepker bolyp otyrǵan kim degen saýaldarǵa jaýap izdegen.

«Ótken jyl aýyl sharýashylyǵy úshin aýyr tıdi. Ásirese eginshilik salasyndaǵy olqylyqtardy tizip berdi. Qyrýar astyq alǵanymyzben, dıqandar ony ótkize almaı áli kúnge deıin júr. Bir Soltústik Qazaqstan oblysynyń ózinde eki mıllıon tonnadaı bıdaı ótpeı jatyr degen derek bar. Astyqtyń ýaqytynda satylmaýy taǵy bir kemshiliktiń betin ashyp bergendeı. Ol - astyq saqtaıtyn qoımalardyń jetispeýshiligi», dep jazady «Alash aınasy» gazeti. Maqala basylymnyń búgingi nómirinde «Astyq kóp, saqtaıtyn oryn joq» degen taqyryppen berilgen.

«Alash aınasy» gazetiniń jazýynsha, Ońtústik Qazaqstan oblysynda adamdardy kene shaǵý oqıǵasy beleń alyp jatyr. Jyl basynan beri 30-ǵa tarta naýqas osyndaı shaǵymmen aýrýhanaǵa túsken. Oblys aýmaǵynda jyl basynan beri qyrym qandy dertinen eki naýqas kóz jumdy. Qazirdiń ózinde oblys aýmaǵynda qyrym qandy bezgegin juqtyrǵan 6 adam tirkelgen. Taǵy beseýi osy kúdikpen dárigerlerdiń baqylaýyna alyndy. Qalyptasqan jaǵdaıǵa baılanysty oblys basshylyǵy óńirde jedel sharalardy qolǵa alýda. «Belgili bolǵan málimetterge qaraǵanda, Ońtústik Qazaqstan oblysynda kenege qarsy zalalsyzdandyrý sharasy sońǵy bes jylda atqarylmaǵan kórinedi. Sonyń saldarynan ótken jyly óńirdegi jaǵdaı ýshyǵyp, aımaqta qyrym qandy bezgegin juqtyrǵan 24 adamnyń toǵyzy qaıtys bolǵan», dep jazady basylym.

***

Belarýs Qyrǵyzstanǵa gýmanıtarlyq kómek kórsetedi. Bul týraly «Ekspress-K» gazeti Belarýs Prezıdenti Aleksandr Lýkashenkonyń málimdemesine silteme jasap habarlap otyr.

Qyrǵyzstannyń burynǵy prezıdenti Qurmanbek Bakıev Mınskige Birikken Arab Ámirlikteri arqyly ushyp kelgen. A.Lýkashenkonyń sózin keltirgen basylymnyń jazýynsha, Qurmanbek Bakıevti Mınskige qabyldaý týraly sheshimdi ol ózi jeke qabyldaǵan. «Zań boıynsha meniń ondaı quqym bar», depti Belarýs prezıdenti.

Degenmen «Lıter» gazetiniń jazýynsha, Q.Bakıevtiń áli de bolsa Qyrǵyzstanǵa bılik etýge úmiti bar kórinedi. Basylymnyń atap ótýinshe, ol bundaı málimdemeni keshe Mınskide ótken baspasóz máslıhaty barysynda málim etken.