Nursultan Nazarbaev: «Álemdik jáne dástúrli dinder kóshbasshylary seziniń formatyn odan ári jetildirý kerek»
ASTANA. 25 qyrkúıek. QazAqparat - QR Prezıdenti jáne Astanada Álemdik jáne dástúrli dinder kóshbasshylary sammıtin ótkizýge bastamashy bolǵan Nursultan Nazarbaev búgin elordada ótip jatqan «Órkenıetter dıalogyndaǵy Astana dinaralyq forýmynyń róli» halyqaralyq ǵylymı-praktıkalyq konferentsııanyń qatysýshylaryna habarlama jiberdi. Onda sezdiń áleýeti áli tolyq ashylmaǵany, sondyqtan onyń aýqymyn ulǵaıtý kerek ekeni atap aıtyldy.
Memleket basshysynyń quttyqtaý sózin QR Prezıdenti ákimshiligi basshysynyń orynbasary Baǵlan Maılybaev jetkizdi.
«Qurmetti konferentsııa qatysýshylary, Astanadaǵy Álemdik jáne dástúrli dinder sezi - ýaqyt eleginen ekshelip ótken jahandyq dıalogtyq alań. Ol ǵalamshardaǵy dinaralyq jáne mádenıetaralyq árekettestik pen ózara túsinistikti nyǵaıtýdyń biregeı quralyna aınaldy», - dep atap ótildi Prezıdenttiń quttyqtaý sózinde.
"Qaqtyǵystardyń shıelenisýi men paıda bolýynyń aldyn alý úshin dinı qaıratkerler, ǵylymı-saraptamalyq birlestikter men BAQ-ty tarta otyryp jan-jaqty dıalogty damytý qajet. Sezd toleranttylyq pen senim ıdeıasyn alǵa jeteleıtin aýqymdy gýmanıtarlyq dıalogtyń alǵy shebinde bolýy kerek. Osyndaı qaıyrymdy ári jaýapty mindetti júzege asyrý úshin sezdiń áleýetin asha túsip, formatyn odan ári jetildirý qajet". Konferentsııanyń qyzmeti osy mindetti oryndaýǵa yqpal etedi dep senemin. Barlyq qatysýshylarǵa jumystaryńyz jemisti bolsyn dep tileımin», - dep jazdy Nursultan Nazarbaev.
