Nursultan Nazarbaev álemdegi sanktsııalyq soǵystarǵa qatysty pikir bildirdi
«Bul jalpy úlken saıası másele. Shynynda da Reseı men AQSh-tyń, Batystyń arasynda bir-birimen sanktsııalar oryn alyp, óte qıyn bolyp tur. Qansha aıtsa da bul Reseıge ońaı emes. Eýropanyń ózi qazir AQSh-pen kelispeı jatyr. Shekarada tyıym salý, taýarlaryn almaý oryn alýda. Integratsııa báseńdep keledi. Amerıka men Tynyq muhıty elderi arasyndaǵy kezdesýler, tipti janyndaǵy Kanadamen, Meksıkamen qarym-qatynas nasharlaýda. Dúnıejúzilik saýda uıymynda sheshilgen, qol qoıylǵan máseleler oryndalmaı jatyr. Saıasatta da BUU sheshimi qaperge alynbaı, memleketter ózara qaqtyǵysyp jatqan kezde Shanhaı yntymaqtastyq uıymy elder úshin úmit oty bolyp tur», - dedi Elbasy.
Máselen, Prezıdenttiń aıtýynsha, ótken jyly «Bir beldeý, bir jol» forýmyn ótkizip, oǵan 137 eldiń ókili qatysqan.
«Bul neni bildiredi? Barlyq ıntegratsııalyq qarym-qatynastar, jalpy jahandaný álsiregen kezde qandaı da bir jol izdeý qajet. Halyqaralyq barlyq sharttar, saıası sheshimder oryndalmaǵan jaǵdaıda Qazaqstannyń tikeleı qatysty bar Jibek joly bastamasy adamdarǵa úmit syılady. 60 memleket tikeleı baılanysyp otyr. Bul jolǵy sammıt tarıhı sát boldy. Óıtkeni, ShYU-ǵa Pákistan men Úndistannyń qosylýy ony álemniń 40 paıyz halqyn, álem ekonomıkasynyń 20 paıyzyn quraıtyn uıymǵa aınaldyrdy. Barlyǵy da osy jerden ıntegratsııany, naryqty, qarjyny tabamyz dep úmittenedi. Mine, ShYU-ǵa osyndaı senim bar jáne biz osy baǵytta jumys istep jatyrmyz», - dedi Nursultan Nazarbaev.
