Nursultan Nazarbaev: Álemdegi árbir din bizdi yntymaqqa, izgilikke, bir-birimizdi qurmetteýge shaqyrady
ASTANA. QazAqparat - Memleket basshysy Nursultan Nazarbaev «Áziret Sultan» meshitinde boldy, dep habarlady Aqordanyń baspasóz qyzmeti.
Memleket basshysy kópshilik aldynda sóılegen sózinde barsha qazaqstandyqtardy Qurban aıt meıramymen quttyqtady, sondaı-aq jınalǵan jamaǵatpen áńgimelesti.
- Búgin kúlli álemniń jáne Qazaqstannyń musylmandary jarqyn mereke - Qurban aıtty merekelep jatyr. Barshańyz bilesizder, 10 jyldan beri Qurban aıt pen Rojdestvo demalys kúnderi bolyp sanalady. Bul - ıslam dinine de, hrıstıan dinine de memleket qamqorlyǵynyń kórinisi, - dedi Qazaqstan Prezıdenti.
Sondaı-aq, Nursultan Nazarbaev táýelsizdik jyldarynda qol jetken tabystyń bári elimizdegi birlik pen tynyshtyqtyń arqasy ekenin atap ótti.
- Álemdegi árbir din bizdi yntymaqqa, izgilikke, bir-birimizdi qurmetteýge shaqyrady. Quranda óziń toq bolyp, kórshiń ash otyrsa, sen musylman bolyp sanalmaısyń delingen. Onda musylmandardyń aǵymǵa, jikke bólinbeıtini de aıtylǵan. Naǵyz musylman - el-jurtqa, qoǵamǵa, Otanyna kómektesetin, barlyq dindi birdeı kóretin adam, - dedi Memleket basshysy.
Sońynda Qazaqstan Prezıdenti barshany taǵy da merekemen quttyqtap, baq-bereke jáne tabys tiledi.
