Nursultan Nazarbaev álemdegi ahýalǵa alańdaýshylyq bildirdi
«Sońǵy jyldary álemdegi ahýal qarqyndy túrde keri ketip barady. Basty syn-tegeýirin koronavırýs pandemııasy bolyp tur. Dúnıejúzilik densaýlyq saqtaý uıymynyń málimetinshe, qazirdiń ózinde álemde vırýs juqtyrǵandardyń sany 250 mln adamnan asyp túsip, 5 mln-nan astam adam ajal qushty. Bul beıbit ýaqyttaǵy jaǵa ustatarlyq statıstıka. Jahandyq qoǵamdastyq ázirshe vırýstyń taralýyn tizgindeı almaı otyr. Álemdik iri derjavalar arasyndaǵy teke-tirestik kúsheıýi de teris faktorǵa aınalǵan. Ásirese, AQSh pen Qytaı kúshtik qurylymdaryn kóbeıtip otyrǵan Taıvan tóńiregindegi ahýal erekshe alańdaýshylyq týdyrady. Reseı men eýropalyq elder arasyndaǵy geosaıası shıelenis te tómender emes. Ýkraına tóńiregindegi janjal saqtalýda», - dep eske aldy Elbasy «Astana klýb-2021» otyrysynda.
QR Tuńǵysh Prezıdenti Aýǵanstan tóńiregindegi ahýaldyń da kúrdeli bolyp otyrǵandyǵyna nazar aýdartty.
«Tálipterdiń tez aradaǵy jeńisi men amerıkalyqtardyń ketýi bul eldegi ahýaldy túbegeıli kúrdelendirip jiberdi. Aýǵanstan taıaý keleshekte-aq aýqymdy gýmanıtarlyq apatpen betpe-bet kelýi múmkin. BUU málimetinshe, 23 mln adam nemese aýǵan halqynyń jartysynan kóbi azyq-túlik jetispeýshiliginiń zardabyn tartady. Bul bosqyndardyń jańa tolqynyna túrtki bolýy yqtımal. Tek 2021 jyldyń birinshi jartyjyldyǵynda ǵana olardyń sany 400 myń adamnan asyp tústi», - dedi Elbasy.
Nursultan Nazarbaev ıadrolyq strategııalyq turaqtylyq salasyndaǵy jaǵdaı da barynsha kúrdeli bolyp turǵanyn, ıadrolyq qarý-jaraqty baqylaýdyń jahandyq júıesi kúıregendigin atap ótti.
