Nursultan Nazarbaev Aqtaýdaǵy sport kesheninde boldy
AQTAÝ. QazAqparat - Búgin, 3 sáýir kúni Elbasy Nursultan Nazarbaev Aqtaýdaǵy 33 shaǵyn aýdanda jýyrda ǵana salynǵan «Mańǵystaý Arena» kópbeıindi sport kesheninde boldy, dep habarlaıdy QazAqparat tilshisi.
Memleket basshysyna sport keshenin kórý kezinde Mańǵystaý oblysynda jergilikti halyqtyń 25 paıyzy, naqtyraq aıtqanda, 158 myń 250 adam sportpen shuǵyldanatyny aıtyldy. 12 myń bala balalar men jasóspirimderge arnalǵan 18 sport mektebinde sportpen tegin shuǵyldanady. 569 sporttyq qurylǵylardyń 260-y aýyldyq aımaqtarda ornalasqan. 2016 jyly 14 sport nysany paıdalanýǵa berilgen. Bıylǵy jyly «Mańǵystaý-Arena» sport saraıy men Aqtaýdaǵy «Batyr» sport kesheni salynyp bitti. Aldaǵy ýaqytta oblysta taǵy 5 sport nysanyn salý josparda bar. Memleket basshysy sapary barysynda Mańǵystaý oblysynyń sportshylarymen jáne jastarmen júzdesti.
«Men sizderge sáttilik, jemisti nátıjeler men jeńis tileımin»,-dedi Prezıdent.
Aıta ketý kerek, «Mańǵystaý Arena» sport saraıynda 5 zal bar. Olardyń arasyndaǵy eń úlkeni 14 myń sharshy metr aýmaqty alyp jatyr jáne ol jeńil atletıkaǵa arnalǵan. Saraıda sonymen qatar, júgirý joly men granata laqtyrýǵa arnalǵan oryn bar. Sondaı-aq munda túrli deńgeıdegi chempıonattardy ótkizýge arnalǵan úlken zal bar. Munda tipti halyqaralyq sporttyq sharalardy da uıymdastyrýǵa bolady, kórermender zalyna 540 adam syıady. Bul zal oıyn sporty túrlerine arnalǵan (shaǵyn fýtbol, basketbol, voleıbol, úlken tennıs). Bul jerde eki alań qurastyryp, ekeýine de bir mezgilde jarys ótkizip, bolmasa jattyǵý jasaı berýge bolady. Saraıda atalǵandarmen qosa, jekpe-jek sporty túrlerine arnalǵan ortasha zal bar (karate, grek-rım kúresi, boks, erkin kúres, taekvondo, dzıýdo, qazaqsha kúres). Onyń kólemi 36-24 metr. Sondaı-aq nysanda trenajerler zaly men aýyr atletıkaǵa arnalǵan zal qarastyrylǵan.
