Nursultan Nazarbaev AQSh-qa saparyn qorytyndylady
«Men bul elge resmı saparmen keldim. Bizdiń óńirden kelgen birinshi prezıdent boldym. Menińshe, kelissózderimiz óte jaqsy, joǵary deńgeıde ótti. Kóp másele jóninde áńgimelesip, ortaq til tabystyq. Bizge qoldaý kórsetetin boldy, ol asa qajet. Árıne, Amerıka Qurama Shtattary dúnıedegi ekonomıkasy, áskerı qýaty jaǵynan eń alyp memleketterdiń biri», - dedi Elbasy.
Memleket basshysy AQSh-tyń Qazaqstandy Táýelsizdik alǵan kúnnen bastap qoldap kele jatqanyn basa aıtty. Sonymen qatar eki eldiń arasyndaǵy ekonomıkalyq baılanystarǵa da toqtaldy.
«Bizge amerıkalyq kompanııalar 50 mlrd dollardan astam ınvestıtsııa quıdy. Ary da júzege asyrar jobalary barshylyq. 550 birlesken óndiris jumys isteıdi. Amerıkalyq isker top ókilderi bizdiń isker adamdarymyzben dóńgelek ústel basynda kezdeskende 20-dan astam kelisimsharttarǵa qol qoıdy. 7,5 mlrd dollardyń jobasyn birlesip júzege asyratyn boldy», - dedi Qazaqstan Prezıdenti.
Nursultan Nazarbaev Tramppen ekeýara kezdesýi barysynda óńirlik jáne halyqaralyq saıasat máseleleri de qozǵalǵanyn aıtty. Onyń ishinde Ortalyq Azııadaǵy 5 memlekettiń Amerıkamen yntymaqtastyǵynyń S5+1 jobasy jaıy, Aýǵanstan máselesi, Amerıka men Reseı arasyndaǵy jaǵdaı, Ýkraına. Soltústik Koreıa, Sırııa. Iran máseleleri qozǵalǵanyn atap ótti.
