Nursultan Nazarbaev ákimderdiń partııalyq jumysyna kóńili tolmaıtynyn aıtty

NUR-SULTAN. QazAqparat – Jergilikti máslıhattar ózderine berilgen quqyqtardy paıdalanýy qajet. Bul týraly «Nur Otan» partııasy Saıası keńesiniń keńeıtilgen otyrysynda QR Tuńǵysh Prezıdenti – Elbasy Nursultan Nazarbaev aıtty, dep habarlaıdy QazAqparat tilshisi.

«Búgingi kúni máslıhattar óńirlerdiń damýyna shynaıy yqpal etetin tetikterge ıe. Zańnamaǵa sáıkes olar bıýdjetti, jergilikti damý baǵdarlamalaryn bekitip, bıýdjet qarajatynyń jumsalýyn baqylaı alady. Ákimderge senimsizdik tanytý quqyǵyna da ıe bolyp otyr. Biz bul quqyqtardy qaı jerde paıdalandyq? Qazir ákim men fraktsııa tóraǵasy bir adam bolǵan kezde tártip bolmaıtyndyǵy aıtylýda. Bólý qajet. Men qazaqtyń jaǵdaıyn bilemin ǵoı. Eki qoshqardyń basy bir qazanǵa syımaıdy. Sodan taǵy kelispeýshilikter týyndaıdy. Al eger ony jasamaıyq desek, ákimder nege jumys istemeısizder? Partııa óz aldyna, meniń jumysym myna jaqta óz aldyna. Eger ondaı bolatyn bolsa ber basqa adamǵa, partııanyń tóraǵasy emespin dep shyq», - dedi Elbasy.

Osy rette QR Tuńǵysh Prezıdenti barlyq deńgeıdegi ákimderge partııa jumysyna apta, aı saıyn kóńil bólip, bedelin arttyryp otyrý qajettigin eskertti.

«Senderdi saılaǵan solar. Eger shyndyǵyn aıtar bolsaq, fraktsııalardyń kópshiligi búginde tıimsiz jumys isteıdi. Bıýdjet qabyldanbastan buryn máslıhatta qaralýy kerek. Fraktsııa jergilikti bıýdjetti maquldaýy tıis. Sodan keıin baryp qabyldaýy qajet. Almatyda qolǵa alyp edik, durys boldy», - dedi Nursultan Nazarbaev.