Nursultan Nazarbaev ádebıet jáne óner salasyndaǵy memlekettik syılyqtardy tapsyrdy
Atap aıtqanda aqyn Tynyshtyqbek Ábdikákimovke «Alqońyr dúnıe» óleńder men balladalar jınaǵy úshin; aqyn Aqushtap Baqtygereıqyzy Baqtygereevaǵa «Ana syry» óleńder men balladalar jınaǵy úshin, aqyn Ótegen Oralbaıuly Oralbaevqa «Shýaqty shaq» jyr jınaǵy úshin berildi.
Munan bólek, Nursultan Nazarbaev eki avtorlyq ujymǵa da memlekettik syılyqty tapsyrdy.
Naqty aıtqanda, Tóleýbek Nyǵmetuly Álpıevke, Alan Asqaruly Bóribaevqa, Súndet Ábdirahmanuly Baıǵojınge, «Astana Opera» memlekettik opera jáne balet teatry» kommertsııalyq emes aktsıonerlik qoǵamynyń shyǵarmashylyq ujymyna qatysýshylarǵa «Abaı» operasy (L. Hamıdı, A. Jubanov) úshin; Aqan Qarǵambaıuly Sataevqa, Álııa Nursultanqyzy Nazarbaevaǵa, Tımýr Qazbekuly Jaqsylyqovqa, Altynaı Baýyrjanqyzy Nógerbekke, Ádil Eralyuly Ahmetovke «Anaǵa aparar jol» tolyqmetrli kórkem fılmi úshin memlekettik syılyq tapsyryldy.
«Nursultan Ábishuly, Uly dalanyń erkin daýsyn tórtkúl álemge estirtý dáýiri Sizdeı ulǵa buıyrǵany taǵdyr syıy ekeni ras. Qasıetti Atamekenniń ótken rýhyn jańǵyrtyp, jas urpaq sanasynda jeti qasıetin qaıtadan esine salyp, parasatpen, ulylyqpen, saıasatkerlikpen jańa ǵasyr kóshine jalǵap otyrǵan eńbegińiz álemge aıan. Óz basym atqa minip, dombyra tartyp ósken sezimtal júregińizge qaıran qalatynymdy jasyra almaımyn. Erekshe adamsyz, óneri uly bolmaı memleket uly bolmaıdy. Kitap oqylmaıdy degen beker sóz. Qazaq ádebıetiniń jaýharlarynyń álemniń búginde alty tiline aýdaryla bastaýy, álem ádebıetiniń ozyq úlgileriniń qazaq tiline aýdarylyp kelýi soǵan bastalǵan uly qadam dep bilemiz. Erkindiktiń kók týyn qyran minez qaısarlyǵyńyzben bıiktete bererińizge senimdimiz jáne tilekshimiz», - dedi Elbasy qolynan memlekettik syılyq alǵan Aqushtap Baqtygereeva.
